Andy Burnham po nxitet të adoptojë një qasje “populiste ekonomike” për të përballuar krizën e kostos së jetesës, nëse ai bëhet kryeministër. Një sondazh i detajuar tregon se politika të tilla radikale mund ta ndihmojnë Partinë Laburiste të ruajë shumicën e saj në zgjedhjet e ardhshme parlamentare.
Sondazhi i realizuar nga Persuasion UK, i bazuar në opinionet e rreth 10,000 votuesve, tregon se nëse pasuesi i Keir Starmer-it zbaton masa si kontrolli i qirave dhe taksa më të larta mbi pasurinë, partia mund të sigurojë 34% të votave kombëtare dhe 358 vende në parlament, duke mbajtur një shumicë prej 66 vendesh.
Idetë e testuara në sondazh përfshijnë vendosjen e një freni emergjent për qiratë, ndërtimin e më shumë shtëpive sociale, garanci për energji të përballueshme, tarifa të lira për autobusët, zgjerimin e ushqimit falas në shkolla për të gjithë fëmijët e arsimit fillor dhe barazimin e taksave mbi fitimet e investitorëve me ato të pagave të punëtorëve.
Një burim pranë tij deklaroi se Burnham nuk do të ndjekë një qasje të zakonshme nëse zëvendëson Starmer-in. Sipas këtij burimi, instinktet e tij janë ndërhyrëse në ekonomi dhe ai do të veprojë për të nxitur rritjen dhe standardet e jetesës.
Ndërkohë, brenda radhëve të Labour-it ka edhe paralajmërime kundër një agjende tërësisht radikale, për shkak të shqetësimeve mbi financat publike. Burnham po shqyrton emërimin e Ed Miliband si kancelar, ndërsa disa deputetë kanë propozuar Pat McFadden si një alternativë më të sigurt. Sipas të dhënave, në 124 zona ku Reform UK përbën kërcënim, platforma e “populizmit të kostos së jetesës” mund t’i mundësonte Labour-it të mbante 92 vende, krahasuar me 41 vende në sondazhet aktuale.
Burimi: theguardian.com