Julian Nagelsmann nuk është më trajner i Kombëtares së Gjermanisë pas eliminimit të papritur të ekipit nga Kupa e Botës. Gjermania u mposht 4-3 nga Paraguai pas ekzekutimit të penalltive në raundin e 32-ve, duke shënuar kështu eliminimin e tretë radhazi të hershëm nga ky turne, pas dështimeve për të kaluar fazën e grupeve në edicionet e viteve 2018 dhe 2022.
Bernd Neuendorf, presidenti i Federatës Gjermane të Futbollit (DFB), ka falënderuar Nagelsmannin për punën e tij që nga shtatori i vitit 2023. Nagelsmann, i cili mori drejtimin e ekipit pas Hansi Flick, ishte trajneri i dytë më i ri në historinë e kombëtares gjermane në moshën 36-vjeçare.
Federata Gjermane e Futbollit ka bërë të ditur se do të nisë bisedimet me Jürgen Klopp për postin e trajnerit të ri. Klopp nuk ka qenë i angazhuar në menaxhimin e ekipeve që nga largimi nga Liverpooli në vitin 2024, ndërsa në janar të vitit 2025 u emërua Shef i Futbollit në Red Bull.
Megjithatë, Klopp ka reaguar pas eliminimit të Gjermanisë duke deklaruar se nuk është momenti i duhur për të diskutuar për të ardhmen e tij. Në një prononcim për Magenta TV, ku shërbeu si analist gjatë këtij Botërori, ai theksoi se aktualisht ka një punë që e pëlqen shumë.
“E kuptoj që kur flitet për trajnerin e kombëtares, emri im përmendet. Por nuk është momenti i duhur për të folur për këtë, veçanërisht jo me mua”, tha Klopp. Ai shtoi se puna e tij aktuale nuk është një angazhim me kohë të pjesshme dhe se eliminimi i Gjermanisë nuk është çasti për të menduar për të ardhmen e tij personale.
Burimi: espn.com