Gjashtë organizata të të drejtave të njeriut dhe lirisë së shtypit kanë paralajmëruar se marrëveshja kornizë mes Izraelit dhe Libanit “rrezikon të tradhtojë viktimat e krimeve të luftës”. Në një deklaratë të përbashkët të publikuar të premten, Amnesty International, Human Rights Watch, Qendra Libaneze për të Drejtën e Njeriut (CLDH), Legal Agenda, Reporters Without Borders (RSF) dhe Unioni i Gazetarëve në Liban shprehën shqetësimin se marrëveshja synon të pengojë viktimat në kërkimin e drejtësisë përmes forumeve ndërkombëtare.
Sipas tyre, këto dispozita do të pengojnë Libanin dhe Izraelin që t’i drejtohen gjykatave ndërkombëtare, përfshirë Gjykatën Ndërkombëtare Penale dhe Gjykatën Ndërkombëtare të Drejtësisë. Klauzola 3 gjithashtu kushtëzon kthimin e banorëve në zonat kufitare me çarmatimin e grupeve të armatosura jo-shtetërore, gjë që organizatat e konsiderojnë në kundërshtim me ligjin ndërkombëtar humanitar.
Agnes Callamard, Sekretare e Përgjithshme e Amnesty International, deklaroi se çdo marrëveshje që nuk vendos në qendër të drejtat për drejtësi dhe reparacione do të dështojë për shkak të pandëshkueshmërisë që krijon. Ghida Frangieh nga Legal Agenda shtoi se shtetet nuk mund të negociojnë apo të heqin dorë nga detyrimi ligjor për të hetuar dhe ndjekur penalisht krimet më të rënda.
Nga ana tjetër, Presidenti i Libanit, Joseph Aoun, u shpreh se marrëveshja nuk legjitimon okupimin izraelit, por fuqizon ushtrinë libaneze për të shtrirë autoritetin e saj në të gjithë territorin.
Ndërkohë, pas armëpushimit të 21 qershorit, Organizata Ndërkombëtare për Migracion (IOM) raportoi se mbi 646 mijë persona të zhvendosur kanë filluar kthimin në shtëpitë e tyre. Megjithatë, rreth 500 mijë të tjerë mbeten të zhvendosur, ndërsa shumë banorë në jug të Libanit përballen me shkatërrimin e plotë të vendbanimeve të tyre nga forcat izraelite.
Burimi: aljazeera.com