Menaxheri i Anglisë, Thomas Tuchel, ka hedhur poshtë shqetësimet lidhur me ndonjë ndërprerje të mundshme nga tifozët meksikanë, duke vlerësuar pritjen që ekipi i tij ka marrë pas mbërritjes në Mexico City. Anglia po përgatitet për ndeshjen e raundit të 16-të të Kupës së Botës 2026, e cila do të zhvillohet të hënën kundër Meksikës.
Më herët gjatë turneut, Ekuadori kishte paraqitur një ankesë në FIFA për shkak të zhurmës së shkaktuar nga tifozët meksikanë jashtë hotelit të tyre, ku përfshiheshin muzikë me altoparlantë, zhurmë motorësh dhe borive gjatë orëve të vona të natës. Për të shmangur situata të ngjashme, FIFA ka zbatuar masa të shtuara sigurie për ekipin anglez, duke përfshirë praninë e Gardës Kombëtare të Meksikës në hyrje të hotelit dhe policisë me pajisje anti-trazira.
Ai theksoi se FIFA është kujdesur për situatën dhe se siguria rreth hotelit u mundëson lojtarëve të kenë një gjumë të qetë. Trajneri shtoi se nuk dëshiron të flasë për probleme që ende nuk ekzistojnë, duke preferuar një qasje të qetë dhe të relaksuar.
Përveç atmosferës që pritet të jetë e zjarrtë nga tifozët vendas, ekipi anglez do të duhet të përballet edhe me vështirësitë fizike që sjell luajtja në lartësi mbidetare.
Tuchel e përshkroi përballjen si një ndeshje të vërtetë të Kupës së Botës. Sipas tij, zhvillimi i këtij takimi në një stadium të tillë dhe në një fazë kaq të rëndësishme të turneut, ndikon pozitivisht në përqendrimin e lojtarëve dhe nxjerr më të mirën nga ekipi. Ai përfundoi duke thënë se pritja që i është bërë ekipit ka qenë edhe më e mirë se sa kishte pritur.
Burimi: independent.co.uk