Rrjeti kombëtar i energjisë në Kubë ka pësuar kolaps, duke shkaktuar blackout-in e tretë mbarëkombëtar në më pak se dhjetë ditë. Kjo ndërprerje ka lënë rreth 10 milionë njerëz pa energji elektrike. Sipas kompanisë shtetërore të energjisë, UNE, ndërprerja filloi të martën rreth orës 11:00 sipas kohës lokale (15:00 GMT), kur i gjithë rrjeti elektrik i vendit doli jashtë funksionit.
Ministria e Energjisë dhe Minierave e Kubës njoftoi përmes rrjeteve sociale se ka ndodhur një shkëputje totale e sistemit elektrik. Situata vjen në një kohë kur Kuba po përballet me krizën më të rëndë ekonomike në dekada, e cila është përkeqësuar nga bllokada e naftës e vendosur nga Shtetet e Bashkuara.
Sipas të dhënave të Agjencisë Ndërkombëtare të Energjisë për vitin 2023, Kuba prodhonte vetëm rreth 40 për qind të naftës që konsumonte, duke mbetur kështu shumë e varur nga karburanti i importuar. Venezuela kishte qenë furnizuesi kryesor i naftës së subvencionuar për Kubën, ndërsa nën presionin e SHBA-së, edhe Meksika ndaloi dërgesat e karburantit drejt ishullit.
Ndërprerjet e përsëritura kanë nxitur pakënaqësi në ishull. Një javë më parë, në Havana u zhvilluan protesta ku banorët goditën tenxhere dhe tiganë, duke kërkuar rikthimin e energjisë. Në dy rastet e mëparshme të javës së kaluar, restaurimi i energjisë në të gjithë vendin zgjati më shumë se 24 orë.
Autoritetet kubane kanë deklaruar se po përpiqen të mbajnë sistemin në funksion, ndërsa rrjeti elektrik, i ndërtuar kryesisht në vitet '60 dhe '80, është bërë gjithnjë e më i prirur ndaj kolapsit. Havana fajëson bllokadën amerikane për krizën, ndërsa Uashingtoni pretendon se qeveria kubane është përgjegjëse për përkeqësimin e sistemit. Gjatë një debati në Asamblenë e Përgjithshme të OKB-së javën e kaluar, ambasadori amerikan Michael Waltz deklaroi se udhëheqësit kubanë duhet të ndryshojnë qasjen për të rikthyer energjinë për popullin e tyre.
Burimi: aljazeera.com