Vala e të nxehtit po ushqen zjarre të mëdha në jug të Evropës.
Temperaturat mbi 40 gradë Celsius dhe erërat e forta kanë përkeqësuar situatën me zjarret në Itali, Francë dhe Spanjë, duke detyruar mijëra njerëz të largohen nga shtëpitë dhe zonat turistike.
Në Itali, situata më kritike paraqitet në Sicili, ku rreth 6 mijë zjarrfikës, roje pyjore dhe forca të Mbrojtjes Civile po luftojnë dhjetëra vatra zjarri që kanë përfshirë ishullin prej disa ditësh. Edhe rajoni fqinj i Kalabrisë përballet me mbi 160 zjarre aktive. Autoritetet lokale dyshojnë se shumë prej tyre janë të qëllimshme dhe akuzojnë zjarrvënësit se kanë përdorur metoda mizore për përhapjen e flakëve.
Në Francën jugperëndimore, pranë Bordosë, mbi 10 mijë turistë janë evakuuar nga kampingjet dhe strukturat turistike, pasi një zjarr i madh ka shkrumbuar rreth 2 mijë hektarë pyje me pisha në zonën bregdetare të Le Porge. Vetëm dy ditë më parë, dy zjarrfikës humbën jetën gjatë përballjes me një tjetër vatër pranë aeroportit të Bordosë. Sindikatat paralajmërojnë se efektivët po punojnë në kushte rraskapitëse dhe me mungesë burimesh.
Shkencëtarët paralajmërojnë se ndryshimet klimatike, të shkaktuara nga djegia e lëndëve fosile, po i bëjnë zjarret dhe valët e të nxehtit më të shpeshta, më intensive dhe më të vështira për t’u përballuar.