Departamenti i Drejtësisë i Shteteve të Bashkuara ka tërhequr kërkesat për informacione (subpoenas) të lëshuara ndaj gazetarëve të The New York Times. Kërkesat kishin të bënin me një raportim të gazetës mbi shqetësimet e sigurisë lidhur me përdorimin e një avioni të dhuruar nga Katari për Presidentin Donald Trump.
Vendimi për tërheqjen e tyre u njoftua nga një prokuror i zyrës së Clayton-it përpara gjyqtarit federal Arun Subramanian, pas një seance ku gjyqtari kishte kërkuar sqarime mbi procedurat e hetimit për rrjedhjen e informacionit.
Megjithatë, ai theksoi se hetimi mbetet i hapur dhe se qeveria mund t'u drejtohet sërish gazetarëve me kërkesa të ngjashme në të ardhmen.
The New York Times kishte kundërshtuar kërkesat në gjykatë, duke argumentuar se ato synonin intimidimin e gazetarëve dhe shkelnin mbrojtjen e lirisë së shtypit sipas Amendamentit të Parë të Kushtetutës. Nga ana tjetër, prokurorët mohuan parregullsitë, duke deklaruar se raportimi i gazetës përbënte një shqetësim për sigurinë kombëtare për shkak të zbulimit të informacioneve të klasifikuara gjatë një periudhe armiqësish.
Grupet e medias kanë kritikuar administratën e Presidentit Trump për përdorimin e shpeshtë të kërkesave për informacione dhe urdhrave të kontrollit ndaj gazetarëve, duke përfshirë raste që kanë prekur edhe Washington Post dhe Wall Street Journal. Administrata Trump ka deklaruar se fokusi i saj është ndjekja penale e personave që nxjerrin informacione të klasifikuara, e jo shënjestrimi i vetë gazetarëve.
Burimi: timesofisrael.com