Kryeministri Albin Kurti ka mohuar diskutimin mbi modelet e mundshme të Asociacionit, në takimin që realizoi të martën me Gabriel Eskobar dhe Miroslav Lajçak, emisarët e ShBA-së, respektivisht BE-së.
Kurti, para mediave u shpreh se nuk kanë diskutuar për kurrfarë modele për zbatimin e Asociacionit. Këto komente, i bëri pas vizitës në Agjencinë e Shërbimeve të Navigacionit Ajror.
“Nuk janë diskutuar modele të tilla. Po e theksoj edhe njëherë. Të drejtat e pakicave janë me nivelit më të lartë të standardeve evropiane”, u shpreh shefi i qeverisë.
Më tej, kryeministri u pyet nga gazetarët edhe rreth dialogut me Serbinë.
“Kosova nuk frikësohet, por Kosova me qeverinë e përgjegjshme është e kujdesshme. Interes i shtetit të pavarur është integriteti territorial, funksionaliteti shtetëror, ligjshmëria”, tha ai.
“Ne kemi dhënë propozimet tona në takimet që kemi pas në Bruksel dhe jemi konstruktiv për bisedimet e ardhshme në dialogun që zhvillohet nga BE-ja. Pranimi i reciprocitetit është parim i shëndosh i marrëdhënieve të mira fqinjësorë. Marrëveshja duhet të arrihet, jemi të gatshëm për këtë”, është shprehur ai.
Sot, gjatë konference për media, Eskobar dhe Lajçak u shprehën se mund të diskutohen modele të ndryshme për Asociacionin.