Sipas shkrimit të mediave ukrainase, elita afariste dhe politike ruse është duke planifikuar atentat ndaj Putinit, dhe si trashëgimtar në kreun e Rusisë e shohin Alexander Bortnikovin.
Në elitën afariste dhe politike ruse po krijohet një grup njerëzish me ndikim të cilët nuk po e mbështesin regjimin e presidentit rus. Dhe jo vetëm kaq, por sipas shkrimit të gazetës ukrainase “Pravda”, e cila citon burimet nga administrata kryesore e inteligjencës e Ministrisë së Mbrojtjes së Ukrainës, i njëjti grup po planifikon edhe të vrasë Putinin.
Nuk dihet ende nëse informacioni i publikuar nga “Pravda” ukrainase është i vërtetë apo është pjesë e luftës propagandistike, raporton “Osllobogjenje” e Sarajevës.
Agjentët e inteligjencës ukrainase thekson gjithashtu se qëllimi i grupit është të “largojë” Putinin nga pushteti sa më shpejt të jetë e mundur dhe të ripërtërijë lidhjet ekonomike me Perëndimin, të cilat u ndërprenë për shkak të luftës në Ukrainë, shkruan gazeta në artikull, transmeton Paparaci.
Gazeta ukrainase pretendon se një pjesë e elitës politike ka zgjedhur kryetarin e FSB-së, Shërbimit Federal Rus të Sigurisë, Alexander Bortnikov, si trashëgimtar të Putinit.
Në tekst gjithashtu theksohet se Bortnikov më nuk gëzon simpatinë e Putinit dhe arsyeja për këtë janë gjoja “vlerësimet e tij të këqija mbi luftën kundër Ukrainës”. Përkatësisht, Bortnikov dhe departamenti i tij ishin përgjegjës për analizimin e qëndrimeve të popullsisë ukrainase dhe kapacitetin e ushtrisë ukrainase.
Sipas inteligjencës ukrainase, të cilën e citon “Pravda” e Ukrainës, Bortnikov dhe disa anëtarë të tjerë me ndikim të elitës ruse po shqyrtojnë opsione të ndryshme për largimin e Putinit, qoftë me helmim, sëmundje të papritur, apo edhe me aksidente të tjera.
Siç raportohet, ka mundësi që këto procese të lidhen me rrjedhjen e fundit të informatave për vendndodhjen e ushtarëve çeçenë në veri të Kievit. Sipas burimeve të inteligjencës, rrjedhja duhet të shërbente për të dobësuar ndikimin e liderit çeçen Ramzan Kadyrov, por edhe për të krijuar bashkëpunim me autoritetet ukrainase, duke anashkaluar udhëheqjen aktuale të Federatës Ruse./Paparaci