Kryeministri Kurti takohet me senatorët Jeanne Shaheen dhe Thomas Tillis
Pas takimit me senatorin Chris Murphy, Kryeministri i Republikës së Kosovës, Albin Kurti u takua edhe me senatorët Jeanne Shaheen dhe Thomas Tillis.
Kryeministri Kurti u shpreh se është kënaqësi t’i takojë përsëri, kësaj radhe në Washington D.C. U diskutua për veprimet e Qeverisë në luftimin e krimit dhe korrupsionit dhe për rritjen e bashkëpunimit ndërmjet Kosovës dhe ShBA-së.
Ai tha se luftimi i korrupsionit dhe reformat demokratike janë çelësi i suksesit ekonomik të një vendi dhe stimujt e zhvillimit ekonomik në Kosovë.
Duke pasur parasysh potencialin e Kosovës dhe interesimin e qeverisë për të mbështetur sektorin e Teknologjisë së Inovacionit, Senatori Tillis, e ftoi kryeministrin Kurti që të konsiderojë për mundësi bashkëpunimi edhe shtetin e Karolinës së Veriut (North Caroline) që ka rritjen me të shpejtë në industrinë bioteknike.
“Senatorja Shaheen dhe senatori Tillis falënderuan edhe një herë Kosovën dhe institucionet e saj për rreshtimin me botën demokratike në dënimin e agresionit të paprovokuar të Federatës Ruse ndaj Ukrainës dhe kryeministrin Kurti për lidershipin e treguar me rastin e strehimit të afër 1500 qytetarëve afganë të evakuuar në Kosovë”, thuhet në komunikatën e Zyrës së Kryeministrit.