Miliona përdorues të iPhone mund të kualifikohen për pagesa, pas fillimit të një padie ligjore, që akuzon Apple për ngadalësim të fshehtë të performancës së telefonave të vjetër.
Justin Gutmann pretendon se kompania mashtronte përdoruesit për një përmirësim të përformancës, por që në fakt, do të ngadalësonte telefonat, shkruan BBC.
Ai po kërkon dëmshpërblim prej rreth 768 milionë funte për deri në 25 milionë përdorues të iPhone në Mbretërinë e Bashkuar.
Apple thotë se “asnjëherë” nuk e ka shkurtuar qëllimisht jetëgjatësinë e produkteve të saj.
Pretendimi, i cili është paraqitur në Gjykatën e Apelit të Konkurrencës, thotë se Apple ngadalësoi performancën e iPhoneve të vjetër, në një proces të njohur si “mbytje”, në mënyrë që të shmangë tërheqjet ose riparimet e shtrenjta.
Seritë në fjalë janë modelet iPhone 6, 6 Plus, 6S, 6S Plus, SE, 7, 7 Plus, 8, 8 Plus dhe iPhone X.