Federata e Futbollit e Kosovës ka njoftuar sot se ka siguruar shërbimet e futbollistit të talentuar kosovar, Drin Miftari, për përfaqësimin e Kosovës.
Miftari, 18-vjeçar është pjesë e klubit gjerman, FC Kaiserslautern, ku luan në rolin e qendërmbrojtësit.
Ai ka konfirmuar se ka vendosur ta përfaqësojë Kosovën, teksa ka thënë se pret me padurim t’i bashkohet fillimisht Kombëtares 19, por se synimi i tij është që së shpejti të bëhet pjesë e Kombëtares A.
“Jam krenar që kam zgjedhur të luaj për Kosovën dhe mezi pres ta veshë fanellën dardane. Kjo është një mundësi e mirë që t’i tregoj vlerat e mia në fanellën e vendlindjes së prindërve të mi”, ka thënë Miftari.