Kryeministri Albin Kurti i ka dërguar telegram ngushëllimi familjes Sopaj nga Malisheva e cila humbi dy anëtarë në aksidenti e rëndë në magjistralen Podujevë-Prishtinë.
Kurti i ka shprehur ngushëllimet më të sinqerta familjes duke thënë se Kosova bashkëndjen me ta për humbjen tragjike.
“Republika e Kosovës bashkëndjen me familjen tuaj. Shpresoj të mund të gjeni forcën për të përballuar dhimbjen tuaj, që është dhimbje edhe e mbarë popullit. Me mendje e zemër jemi pranë jush, në këto ditë pikëllimi e zie”, thuhet në telegramin e ngushëllimit.
Shefi i qeverisë kosovare i ka uruar fëmijëve të aksidentuar shërim të shpejtë.
Telegrami i plotë i kryeministrit Kurti:
E nderuara familje Sopaj,
Me trishtim e pikëllim të thellë e morëm lajmin për humbjen e jetëve të familjarëve tuaj.
Në emër të Qeverisë së Republikës së Kosovës dhe në emrin tim personal, u shpreh ngushëllimet më të sinqerta për këtë humbje Tuajën kaq të madhe.
Fëmijëve të lënduar u dëshiroj shërim të shpejtë dhe uroj që të tejkalojnë sa më lehtë pasojat e aksidentit.
Republika e Kosovës bashkëndjen me familjen tuaj. Shpresoj të mund të gjeni forcën për të përballuar dhimbjen tuaj, që është dhimbje edhe e mbarë popullit.
Me mendje e zemër jemi pranë jush, në këto ditë pikëllimi e zie.
Me nderime,
Albin Kurti
Kryeministër i Republikës së Kosovës
Shemsedin dhe Mervete Sopaj do të varrosen sot në ora 18:00 në Malishevë.
Çifti Sopaj po ktheheshin në vendlindje kur ndodhi aksidenti tragjik në një fshat të Podujevës. Ata ishin bashkë me dy fëmijët e tyre, 3 dhe 4 vjeç, të cilët kanë shpëtuar dhe po trajtohen në QKUK.