Një grup protestuesish në Beograd kanë hedhur një bombë tymuese në oborrin e Ambasadës së Republikës së Shqipërisë në kryeqytetin serb mbrëmjen e së mërkures, kanë thënë burime nga Qeveria e Shqipërisë për Paparaci.com.
Akti është motivuar nga ngjarjet tensionuese të paradites së sotme në veri të Kosovës, ku Policia e Kosovës u përplas me banorët lokal serbë të cilët kundërshtonin një operacion policor kundër kontrabandës së mallrave.
Në kryeqendrën e Serbisë, qindra veta u mblodhën në një protestë para Parlamentit të Serbisë kundër veprimeve të Policisë së Kosovës në pjesën veriore të territorit.
Prej aty, protesta e organizuar mbi motive solidarizuese, mori kahje tjetër.
Një grup prej rreth 30 protestuesish vazhduan rrugën nga Parlamenti serb në drejtim të lokacionit ku ndodhet ndërtesa e Ambasadës së Shqipërisë në Beograd, i ka thënë mediumit një burim i mirëinformuar.
Protestuesit kanë hedhur një mjet shpërthyes brenda oborrit të ambasadës.
“Një grup prej 25-30 persona kanë shkuar drejt Ambasadës [së Shqipërisë] dhe kanë hedhur një bombë tymuese në oborrin e Ambasadës”, ka thënë një burim i mediumit Paparaci.com brenda qeverisë shqiptare.
Në orët e hershme të mëngjesit të së mërkurës u dëgjuan sirenat e kamionëve të zjarrfikësve dhe autoambulancave në Mitrovicën e Veriut.
Qytetarët thanë se në orët e mëngjesit nisën të dëgjoheshin edhe sirena e emergjencave në këtë komunë. Policia e Kosovës u panë edhe para farmacive në veri.
Në Mitrovicë të Veriut turmat u shpërndanë, ndërkaq aksioni i Policisë vazhdoi edhe në Zveçan. Në Zveçan, Policia po ashtu hodhi gaz lotsjellës pasi qytetarët hodhën në drejtim të forcave të rendit gjësende të forta.
Aksioni u shpall i përfunduar nga Policia e Kosovës rreth orës 13:00 në mesditë. /Paparaci.com