Besart Ahmeti dhe pjesëtarët e tjerë të Njësisë Speciale Operative, të cilën ai e drejton, u thirrën në detyrë paraditen e së mërkurës.
Operacioni policor i së mërkurës për Njësinë Speciale Operative të Policisë së Kosovës ishte i papritur. I pasoi një operacioni bastisës që kishin ndërmarrë njësitet e tjera policore në veri të vendit.
Në intervenim ndaj protestave të banorëve lokal serbë që kundërshtonin aksionin policor kundër kontrabandës së mallrave, katër pjesëtarë të NjSO-së mbetën të plagosur, raporton Paparaci.com. Në mesin e tyre edhe Besart Ahmeti, shefi i njësisë.
Ahmeti, siç ka mësuar Paparaci.com, është plagosur nga një granatë dore të hedhur në drejtim të tij nga protestuesit.
Aksioni i 13 tetorit i Policisë dhe Doganës së Kosovës, përpos Mitrovicës së Veriut, u zhvillua edhe në rajonet e Prishtinës, Pejës, Mitrovicës së Jugut.
Gjatë përleshjeve mes Policisë dhe protestuesve, autoritetet njoftuan se u lënduan dhjetë policë, ndërkaq, autoritetet shëndetësore në Mitrovicë të Veriut thanë se edhe dhjetë qytetarë kërkuan ndihmë mjekësore.
Po ashtu, tetë persona u arrestuan, nën dyshimet për kontrabandim të mallrave. Tre prej të prangosurve u liruan në procedurë të rregullt të enjten, një ditë më vonë. /Paparaci.com