Mjekët që punojnë në spitalet komunale të Gjermanisë kanë bojkotuar vendet e punës me kërkesën për paga dhe kushte më të mira.
Në qytetin e Hamburgut, rreth 2000 mjekë marshuan në qendër të qytetit duke mbajtur pankarta, ku shkruhej “Punë e mirë-pagë e mirë”.
Sipas mediave të huaja, greva kishte në shënjestër spitalet publike në shtatë nga 16 shtetet e Gjermanisë dhe spitalet private.
Sindikata e mjekëve Marburger Bund po kërkon kompensim për inflacionin që nga rritja e fundit e pagave në vjeshtën e 2021 plus një rritje prej 2.5% për 55,000 mjekë spitalorë.
Ajo ka bërë thirrje për greva të mëtejshme në shtetet e tjera më 30 mars. Shoqata e punëdhënësve VKA tha se kërkesat për kompensim inflacioni dhe rritje page ishin të paarsyeshme.