Nënkryetarja e PDK-së, Vlora Çitaku, i është kundërpërgjigjur deklaratës së sotme të kryeministrit të Kosovës, Albin Kurti, i cili tregoi se në planin evropian gjendet edhe Asociacioni i Komunave me Shumicë serbe.
Çitaku ka përzgjedhur në shkrimin e saj një poezi të poetit dhe publicistit të njohur shqiptar, Fan Nolit, për ta thumbuar shefin e qeverisë.
““Dhe Feridi faqe ndërron, Dje shante, sot lëvdon – Fan Noli”, shkroi në Facebookun e saj ish-ambasadorja e Kosovës në ShBA, transmeton Paparaci.
Kurti sonte ka thënë se në planin evropian për normalizimin e marrëdhënieve mes Kosovës dhe Serbisë është edhe Asociacioni i Komunave me Shumicë serbe.
“Ka asociacion, neni 10 thotë që të dyja palët e konfirmojnë obligimin e tyre për t’i zbatuar marrëveshjet e kaluara për të cilat ngelen valide dhe të obligueshme. 39 marrëveshje janë. Dy prej tyre, marrëveshja për kthimin e librave kadastralë që s’ka ndodh as sot e kësaj dite, ndërkaq ajo marrëveshja e parë e parimeve, ku 6 pikat e para janë për Asociacionin është marrëveshja e 16 që muajin që vjen i mbush 10 vjet”, tha ai në RTK.