Drejtori i Sportit në Komunën e Prishtinës, Granit Rugova, ka njoftuar banorët e lagjes Taukbahqe se së shpejti do të ndërtohet shtegu për ecje dhe vrapim, transmeton Paparaci.
Me anë të një videoje të publikuar në Facebook, Rugova tha se Taukbahqja është destinacioni i shumë sportistëve dhe qytetarëve për vite me radhë, “por fatkeqësisht, shtegu për ecje dhe vrapim ka kohë që është dëmtuar rëndë”.
Kësisoj, ai u shpreh se ka filluar proceduar për rinovimin e tërësishëm të këtij shtegu.
“Prandaj, për t’ua kthyer sportistëve këtë lokacion për përgatitjet e tyre, por edhe qytetarëve për rekreacion, me knaqesi ju informoj se kemi filluar me procedurat për rinovimin e tërësishëm të këtij shtegu”, shtoi ai.
“Taukbahqja do të ketë shtegun më të mirë të ecjes dhe vrapimit në kryeqytet, dhe do të bëhet destinacion për të gjithë. Prishtina, qytet i Sportit”, theksoi Rugova.