Me kërkesë të liderëve të Listës Serbe që pjesëtarët e KFOR-it të vendosen në disa lokacione shtesë, oficeri i KFOR-t është përgjigjur: “Ose i vendosim ose nuk i vendosim forcat tona në lokacionet sipas kërkesës suaj”.
Lista Serbe ka kërkuar nga KFOR-i, i cili është vendosur para ndërtesës komunale në Zveçan që nga e hëna, që të vendosë ushtarë shtesë në udhëkryqet në Zveçan, në mënyrë që të mos ketë kontakt mes popullatës që është mbledhur për të protestuar dhe Policisë së Kosovës, e cila, siç pretendojnë ata, është në këtë zonë, raporton portali “Kossev”.
Ata vendosën ta bëjnë këtë pas një incidenti që ndodhi dje kur qytetarët thyen xhamin e një veture të policisë, e cila sipas kreut të Listës Serbe, “ishte e mbushur me policë dhe ka kaluar nëpër turmën e qytetarëve me qëllim”, siç tha ai, “që të provokojë”. Ai gjithashtu ka pretenduar se policët ndalojnë automjetet dhe arrestojnë këdo te i cili gjen një flamur serb ose simbole në një bluzë që “nuk i pëlqejnë”.
Këtë në bisedën e djeshme ia kanë përcjellë shefit të KFOR-it amerikan, Goran Rakiq dhe Igor Simiq, me të cilin kanë negociuar që nga e hëna, e që më vonë, po të njëjtën ditë, serbët u konfrontuan me KFOR-in. Tridhjetë ushtarë u plagosën, tre prej tyre rëndë dhe atë me armë zjarri. Nga ana serbe, spitali ka pretenduar për një numër prej mbi 50 të plagosur dhe një të plagosur rëndë, po ashtu me armë zjarri.
Ndonëse ai u ka ofruar që të vijnë dhe të bisedojnë në zonën të cilën e sigurojnë, tani shumë më gjerë se të hënën, dyshja vendosën ta bëjnë këtë përmes telave me gjemba, të cilat KFOR-i i kishte shtrirë më parë, dhe para dhjetëra kamerave, transmeton Paparaci.
“Ok”, tha amerikani.
Pasi i dëgjoi, ai u tha: “Absolutisht do të më pëlqente ta bëja këtë. Por problemi është se të hënën, kur ushtarët e mi u ndanë nga turma që ishte mbledhur, ju kërkova disa herë që të lëvizni turmën në mënyrë që të kisha komunikim, liri lëvizjeje dhe në të njëjtën kohë të siguroja një mjedis të sigurt ndërmjet forcave të KFOR-it e të cilat ishin të ndara nga njëra-tjetra, në mënyrë që të isha i sigurt se mund të shkoja në secilën prej tyre. Jam i sigurt që ju kujtohet se si biseduam për këtë disa herë dhe nuk arritëm marrëveshje dhe unë nuk arrita të lëviz lirshëm në forcat e mia të KFOR-it, përveçse të lëvizja nëpër masën e njerëzve të mbledhur dhe atë përmes të njëjtës masë që sulmoi automjetet e mia, pas tetë orësh diskutimi profesional dhe me respektin se bashkërisht mund të arrijmë një marrëveshje për paqen.
Kështu që do të më pëlqente absolutisht ta vendos KFOR-in në këto lokacione, por me atë që di nga e hëna, jam shumë i shqetësuar se do të përfundojmë në të njëjtën situatë që kishim të hënën dhe unë nuk mund ta lejoj këtë. Unë jam këtu për të garantuar siguri për të gjithë, përfshirë KFOR-in”.
Rakiq nuk është pajtuar me të se pjesëtarët e KFOR-it nuk janë të lirë, por qytetarët kanë protestuar që njësitet policore nuk guxojnë të lëvizin, duke i kërkuar edhe një herë që KFOR-i të ndihmojë tani.
Anëtari i KFOR-it u kujtoi atyre se i duhen garanci se tani, kur ka dyfish më shumë njerëz se të hënën, nuk do t’i ndodh e njëjta gjë që kishte përjetuar të hënën, duke theksuar edhe një herë se nuk ka mundur t’i arrijë ushtarët e tij përveç që lëviz nëpër masë.
“Dhe kur arrita të shkoj te automjeti im, ai ishte dëmtuar dhe përdhosur, me simbole të mosrespektimit të shkruara qëllimisht në të”. Kështu që, nëse më thua se mund të përsëritet e njëjta gjë, këtë nuk dua”, ka thënë ky oficer.
“Sepse nëse do të kërkoja pëlqimin tuaj, me koordinim, që të shkoj te ushtarët e mi të cilët do t’i vendosja në lokacionet që keni kërkuar dhe ata shkojnë atje me automjetet të cilat ju i keni përdhosur, duke mos respektuar flamujt e tyre, ose do të ketë probleme, siç është fjalori i ndytë si po u flitet ushtarëve të mi, siç e kam përjetuar edhe unë personalisht duke ecur drejt automjetit tim, kur ishte edhe më afër se sa që tani po kërkoni prej meje, kjo më nuk guxon të ndodh”, ka thënë oficeri i KFOR-t, përcjell Paparaci.
Dhe ja si shkoi pjesa tjetër e bisedës mes këtyre liderëve serbë dhe oficerit të KFOR-it:
KFOR-i: “Kam nevojë për premtimin tuaj se këta ushtarë nuk do të shqetësohen, nuk do të kërcënohen, nuk do të keqpërdoren, nuk do të hidhet asgjë në ta dhe nuk do të kenë asnjë problem”.
Rakiq: “Po, mund të garantojmë këtë”.
KFOR-i: “Problemi të cilin gjithashtu e kam, nga përvoja jonë të hënën, kam përvojë këtu në Kosovë për disa muaj – njerëzit vrapojnë me maska, ata duhet të shkojnë e të mos kthehen më”.
Rakiq: “Nuk ka njerëz të tillë”.
KFOR: “Jo vetëm këtu në Zveçan, por në të gjitha lokacionet ku KFOR-i synon t’i mbajë të gjithë të sigurt”. Kam parë me sytë e mi të njëjtët njerëz që mbanin maska dhe i plagosën njerëzit e mi”.
Rakiq: “Këtu?”
KFOR-i: “Po”.
Simiq: “Nëse duam të kemi paqe, edhe një herë kemi një situatë ku provokimet nuk vijnë nga ana jonë dhe në këtë moment po ju tregojmë se çfarë ka ndodhur tridhjetë minuta më parë. Palë e tretë vjen dhe shkakton reagim. Është detyra jonë të kërkojmë mbështetjen tuaj dhe detyra juaj është ta mbroni paqen, ndaj duhet të gjejmë një mënyrë për ta mbrojtur atë. Mbrëmë unë dhe zoti Rakiq ishim me ju. Ne gjithashtu ofrojmë njësiteve tuaja që të qëndrojmë këtu me ju gjatë gjithë natës nëse është e nevojshme. Nuk mund të kthehemi të hënën, sepse edhe ne kemi vuajtur për disa gjëra që nuk i meritonim nga njerëzit – me ose pa maska. Nëse duam ta mbrojmë paqen, duhet t’i ndalojmë ata njerëz që tani po torturojnë njerëz në vende të ndryshme të kësaj komune, dhe këta njerëz janë të veshur me uniforma të kaltra dhe janë nga Policia e Kosovës. Ata mund të provokojnë këtë turmë njerëzish që të reagojnë. Sot ka dyfish më shumë njerëz, por shihet se kemi gra, mjeke dhe deri më tani nuk kemi pasur asnjë incident, as sot e as dje. Dhe tani ju shihni se nuk ka njerëz në këtë turmë të veshur me maska. Pra, nuk mund të kthehemi dhe të mendojmë vetëm për atë ditë. Sepse ju keni disa ankesa, kemi edhe ne. Ne tregojmë vullnetin tonë të mirë për të bashkëpunuar dhe shpresojmë ta zgjidhim këtë çështje”.
KFOR-i: “Të gjithë bëjmë gabime që do të donim të mos kishin ndodhur. Dhe si ju, kur folëm atë mbrëmje, të dy donim të kthenim kohën pas, që ajo që ndodhi atë pasdite të mos kishte ndodhur. Por ajo që mund të bëjmë me të kaluarën është ta përdorim atë për të marrë vendime të zgjuara tani për të ardhmen dhe në të tashmen, dhe prandaj po ju them tani për të hënën, sepse nuk mund ta harrojmë të hënën, sepse e hëna nga kjo javë mund të ndodhë përsëri. Dhe nuk do ta harroj kurrë të hënën për arsye të thjeshtë se kjo nuk do të ndodhë më kurrë”.
Rakiq: “Pajtohem, pajtohem dhe nuk duhet të harrojmë kurrë gjithçka që ka ndodhur, sepse nëse nuk mësojmë nga gabimet tona, gabimet do të përsëriten siç thatë edhe ju dhe jam absolutisht dakord me ju, por kjo nuk do të thotë se nuk duhet të shkojmë tutje dhe se nuk duhet të kemi bashkëpunim. Duhet të kemi bashkëpunim dhe duhet të kemi besim”.
KFOR-i: “Çështja e dytë që më nevojitet – pala e tretë që u përmend, ata nuk guxojnë të lëvizin lirshëm nëpër këtë masë. Nëse ata janë me të vërtetë një palë e tretë dhe e veçantë, me interesa krejtësisht të ndryshme nga të gjithë ju të tjerët, unë pres që kjo turmë t’i dënojë ashpër, t’i shtyjë jashtë dhe të mos pranohen nga ky grup”.
Simiq: “Për atë palën e tretë, ne po mendojmë për Policinë e Kosovës sepse ata po e provokojnë turmën”.
KFOR-i: “Pala e tretë për të cilën po flas unë janë personat që mbajnë maska, për të cilët më thanë se e kanë bërë këtë sepse kanë frikë se policia do t’i kërkojë. Në bazë të asaj që kam parë me sytë e mi, unë e di se çfarë është kjo. Sepse shumica prej tyre, kam parë me sytë e mi, kanë plagosur ushtarët e mi me shok-bomba të cilat ishin të përforcuara me shishe qelqi me bomba të vogla ajrore BB dhe të futur në to – ose alkool, ose karburant, për të ndezur zjarr. Njëzet e pesë ushtarë të KFOR-it janë plagosur. Dhe disa prej tyre kanë plagë me armë zjarri. Për të përsëritur, disa ushtarë të KFOR-it u plagosën me armë zjarri. E pashë me sytë e mi, gjeta një plumb jo shumë larg vendit ku biseduam të hënën mbrëma. Plumbi që është shkrepur nga arma ka një shenjë spinale nga tyta që tregon se mund të vijë vetëm nga shkrepja e tij. Ai plumb mund të shkrepet vetëm nga pushka që nuk e ka askush në NATO – këtu në KFOR.
Arma që shkrepi atë plumb nuk ishte këtu të hënën. Por disi ai plumb ishte aty. Kisha një ushtar të KFOR-it që e nxori atë plumb nga pajisja e tij (Tregon me gisht në bark). Kjo është absolutisht e papranueshme”.
Rakiq: “I vetmi që kishte armë atë ditë ishte njësia speciale e policisë”. Nëse keni ndonjë informacion, që personalisht e keni parë dikë me armë, ju lutem më tregoni. Ne thamë se nuk do të flasim për të hënën. Nuk do ta harrojmë atë ditë dhe erdhëm me pyetjen nëse mund të bashkëpunojmë së bashku, të punojmë së bashku për të ruajtur paqen, dhe erdha t’ju kërkoj që, nëse keni mundësi, t’i vendosni ushtarët tuaj në rrugën magjistrale dhe të mos lejojnë që njësitë speciale të Policisë të provokojnë njerëzit. Unë nuk e kërkoj nga ju, ju lutem, por vetëm nëse keni mundësi ta bëni”.
KFOR-i: “Të hënën kemi biseduar për përkushtim dhe obligime e jo vetëm për fjalë. Unë tani marr përsipër të rishikoj se ku kam mundësi të vendos ushtarët e KFOR-it në lokacionet që keni kërkuar. Do të duhet kohë për të arritur të njëjtin nivel mbrojtjeje për të gjithë këtu në komunitet, për të qenë i sigurt se kam përmbushur misionin tim, se të gjithë këtu janë të sigurt.
Nuk mund t’ju them se sa kohë duhet ta bëj, por kur të kem informacionin tim, do të kthehem të flas me ju për të konfirmuar ose mohuar nëse jam në gjendje të përmbush kërkesën tuaj”./Paparaci.com