Futbollisti i njohur brazilian Dani Alves ka lënë burgun e Barcelonës të hënën, pasi ka paguar garancinë prej një milion eurosh.
Menjëherë, Alves u drejtua për në rezidencën e tij në Esplugas Llobregat (një komunë e vendosur në kufirin me Barcelonën) në lagjen luksoze të Ciudad Diagonal.
Siç raportuan sot mediat spanjolle, Alves organizoi një festë të madhe në shtëpinë e tij vetëm një ditë pas daljes nga burgu, ku “u çmend” me miqtë dhe familjen deri në orët e para të mëngjesit.
Festa thuhet se përfundoi në orën 5 të mëngjesit dhe u organizua nga Alves për të festuar ditëlindjen e babait të tij Domingos Alves Da Silva.
Daniel Alves normalisht duhet të paraqitet çdo të premte në gjykatë në Barcelonë dhe t’i përgjigjet “të gjitha thirrjeve ligjore” deri në gjyqin e tij të ri, data e të cilit ende nuk dihet.
Për kujtesë, gjykata në Spanjë dënoi Dani Alves me katër vjet e gjysmë burg në shkurt për një sulm seksual në Barcelonë më 30 dhjetor 2022.
Para se të dilte nga burgu, Alves duhej të dorëzonte pasaportën e tij braziliane dhe spanjolle, në mënyrë që autoritetet në Spanjë të ishin të sigurt se ai nuk do të ikte në Brazil.