Deputetja e Lidhjes Demokratike të Kosovës, Hykmete Bajrami, i është përgjigjur zëvendësministrit të Financave, Avni Zogianit, për një listë të tenderëve të negociuar të cilën zyrtari i LVV-së e publikoi të enjten.
Zogiani, përmes një liste të publikuar dje, akuzoi dy deputetët aktualë të LDK-së, ish-ministrat Hykmete Bajrami dhe Avdullah Hoti për kontrata me negocim në kohën e qeverisjes PDK-LDK.
Bajrami, ka publikuar dy kontratat e fundit me negocim të cilat i ka lidhur sot Korporata Energjetike e Kosovës.
“Tregoni dikush Zogianit se sot derisa ai e ka postu tekstin që ja kanë dërgu nga qendra e LVV-së, KEK-u ka nënshkru edhe dy kontrata sekrete, njëra prej tyre është kontrata e 14-të me radhë me të njëjtën kompani, për sigurim fizik, 13 i ka pasë të negociume në vlerë prej 5.6 milionë euro, sot është nënshkru kontrata e 14 në vlerë prej 453,122.72 euro (sigurim fizik vetëm për 2 muaj)”, tha ajo.
Pushteti s’do hetim, KEK-u i jep sot dy kontrata të negociuara – peshojnë mbi gjysmë milioni
Bajrami tha se Avni Zogiani duhet ta pyes Blerand Stavilecin për listën e kontratave të cilën e ka publikuar, sepse ajo ka qenë përgjegjësi e anëtarit të PDK-së, e jo e saj, as e ish-ministrit Avdullah Hoti.
“E derisa dje ne kishim tri orë debat parlamentar, ministrja Rizvanolli që është përgjegjëse për ndërmarrjet publike nuk e nxori asnjë fjalë nga goja edhe pse disa herë u pyet nga deputetët për 112 kontrata sekrete të KEK-ut dhe 102 milionë të shpenzuara, LVV sot paska vendosë që përmes Avni Zogianit të me pyes mua e ish Kryeministrin Hoti, jo për ministritë me të cilat ne kemi udhëhequr, por për ministrinë që ka udhëhequr Blerand Stavileci”, tha Bajrami.