Trajneri i Barcelonës, i zhgënjyer si të gjithë tifozët katalanas, thotë se bënë një punë të shkëlqyer këtë sezon në Ligën e Kampionëve, por për shkak të një vendimi arbitri (kartonit të kuq ndaj Araujo pas gjysmë ore lojë), aventura e tyre kontinentale përfundoi mbrëmë:
“E merituam të ishim deri këtu. Kur po luanim 11 kundër 11 dëshmuam se mund të shkonim edhe në gjysmëfinale. Kështu shkoi, në futboll vendimet e arbitrave kanë ndikim dhe kjo na kushtoi shtrenjtë. Ne e merituam gjysmëfinalen për punën e madhe të bërë.
Çfarë mendoj për kartonin e kuq të Araujo? Ai rast vendosi plotësisht fatin e ndeshjes, peshoi dhe ndoti një sfidë fantastike. Ky vendim i arbitrit vendosi kalimin e PSG në raundin tjetër. Në futboll këto gjëra nuk duhet të ndodhin.
A ka ndryshuar vendimi im për t’u larguar në fund të sezonit? Është mëkat që nuk ecëm përpara, e merituam. Nuk kam ndryshuar mendje për të ardhmen time. Barça do të provojë përsëri. Ne kemi bërë një Ligë Kampionësh shumë të denjë, por duhet të kontrollojmë disa detaje nga ndeshjet”.