Dy persona kanë mbetur të vdekur si pasojë e një aksidenti mes një veture dhe një motoçiklete në Shirokë të Suharekës, pasditen e së dielës.
Bëhet fjalë për Petrit Gashin dhe Besnik Haliti nga Komuna e Prizrenit, të cilët kishin qenë në motoçikletë. Ndërkaq shoferja e veturës, Mirlinda Guraziu është dërguar në mbajtje.
Sipas raportit policor thuhet se e dyshuara femër kosovare deri sa ishte duke e drejtuar automjetin e saj, nga pakujdesia kalon në shiritin e kundërt të rrugës dhe goditet me motoçikletën të cilën ishte duke e drejtuar viktima mashkull kosovar.
“Si pasojë e aksidentit vozitësi i motoçikletës si dhe viktima (pasagjeri që gjendej në motoçikletë) mashkull kosovar kanë ndërruar jetë në vendin e ngjarjes sipas konstatimit të mjeku kujdestar, kurse lëndime trupore kishin pësuar dy viktima femra kosovare, pasagjere në veturë”, njofton policia.
Pamjet e mëposhtme shfaqin momentin e përplasjes së veturës me motoçikletën:
Prokuroria Themelore në Prizren tashmë ka parashtruar kërkesë për caktimin e masës së paraburgimit ndaj të dyshuarës për aksidentin tragjik.
Kërkesën e ka konfirmuar zëdhënësja e Prokurorisë Themelore të Prizrenit, Fitore Mehmeti.
E dyshuara Mirlinda Guraziu dyshohet për veprën penale “Rrezikimi i trafikut publik”.
“Prokuroria Themelore në Prizren, ju njofton se lidhur me rastin e aksidentit me fatalitet të ndodhur në fshatin Shirokë – Komuna e Suharekës, me urdhër të prokurorit është ndaluar për 48 orë M.G., për shkak të dyshimit të bazuar se ka kryer veprën penale “Rrezikimi i trafikut publik” nga neni 370 paragrafi 9, lidhur me paragrafin 6 dhe 1, sipas Kodit Penal të Republikës së Kosovës (KPRK). Lidhur me rastin, prokuroria ka parashtruar kërkesë për caktim të masës së paraburgimit”, konfirmoi Mehmeti./Paparaci