Ish-komandanti i Përgjithshëm i UÇK-së, Sylejman Selimi dhe ish-pjesëtari i UÇK-së, Jahir Demaku janë liruar nga akuzat për krime lufte kundër popullatës civile.
Aktgjykimi ndaj Selimit dhe Demakut është shpallur sot nga gjykatësi Ngadhnjim Arrini, raporton Paparaci.
Sipas gjykatësit Arrini, të akuzuarit janë liruar nga akuza pasi nuk është vërtetuar se të njëjtit kanë kryer veprën penale për të cilën ngarkoheshin nga PSRK-ja.
Selimi e Demaku akuzoheshin për keqtrajtimin e një personi në Likoc të Skenderajt.
Jahir Demaku, pas shpalljes së aktgjykimit ndaj tij në Gjykatën e Prishtinës të enjten/ Foto: Paparaci
Më 24 maj 2013, gjeneral Sylejman Selimi ishte arrestuar dhe më vonë ishte shpallur fajtor për një vepër penale të krimeve të luftës kundër popullatës civile nga Gjykata Themelore në Mitrovicë. Ai u dënua me 6 vjet burg.
Në qershor të vitit 2018, të gjithë të akuzuarit që njihen si Drenica 1 dhe Drenica dy ishin kthyer në rigjykim.
Në rastin “Drenica”, janë gjykuar disa nga ish komandantët e UÇK-së të cilët bartnin funksione publike, qoftë deputetë apo edhe kryetar komunash, si Sylejman Selimi, Sami Lushtaku, Fadil Demaku, Nexhat Demaku e të tjerë.