Disa nga të dyshuarit për përfshirje në vrasjen e rreshterit Muhamed Lika, ishin arrestuar vitin e kaluar për djegien e Gjykatës Themelore në Kaçanik, tha sot drejtori i Policisë së Kosovës, Gazmend Hoxha.
Hoxha tha se disa nga të arrestuarit në aksionin e të hënës, kanë precedentë penalë në Policinë e Kosovës.
Disa prej tyre ishin arrestuar vitin e kaluar, dipas drejtorit Hoxha.
“Rreshteri ynë ka qenë në detyrë zyrtare kur kanë ndodhur këto raste dhe pastaj ka punuar në mbështetje të hetimeve të Policisë për zbardhjen e rasteve të mëhershme. Do të thotë, këta janë persona të dyshimtë të cilët kanë qenë më herët të arrestuar për pamfletet dhe djegien e Gjykatës”, tha ai.
“Disa nga të arrestuarit, kanë qenë të arrestuar në këtë rast [djegien e Gjykatës] dhe të njëjtit janë të dyshuar për vrasjen e rreshterit tonë”.
Kryeprokurori i Ferizajt, Burim Çerkini tha se rasti ndaj tyre vazhdon të shqyrtohet në gjykatë.
“Në rastin e Gjykatës janë gjykuar personat për veprimet që i kanë bërë. Nuk është e vërtetë që personat janë liruar për djegien e Gjykatës. Procedurat për ta vazhdojnë. Mirëpo nuk ka ndonjë ndërlidhje eksplicite që djegia e gjykatës ka të bëjë me vrasjen e rreshterit”, tha Çerkini.