Sulmuesi i Kosovës, Vedat Muriqi, nuk shënoi gol për Mallorcan të martën mbrëma. Por Muriqi ishte në qendër të vëmendjes në ndeshjen kundër Valencias.
Ndeshja vendimtare në garë për mbetje në La Liga, ndërmjet Mallorcas dhe Valencias përfundoi baras, 1:1.
Muriqi mbetet me 21 gola të shënuar deri më tani këtë edicion.
Para fillimit të takimit të xhiros së 33-të të kampionatit spanjoll, Muriqi u nderua nga tifozët e Mallorcas.
Gjatë daljes së lojtarëve në fushë, tifozët e Mallorcas shfaqën në tribunë një pankartë gjigante kushtuar sulmuesit të Kosovës, Vedat Muriqi.
Në pankartën dedikuar Muriqit shkruante “Ishulli i Piratit”, ndërsa shikuesit kanë mbajtur nga një kapelë pirati.
Muriqi pati rast të mirë shënimi. Por gjuajtja e tij me kokë në minutën e 63-të u prit nga portieri i Valencias.
Muriqi fundjavën e kaluar theu rekordin e legjendës, Samuel Eto’o për gola të shënuar në La Liga. Muriqi tashmë ka 55 gola, një më shumë se kamerunasi. Në La Liga këtë edicion ka 21 gola.
Mallorca mbetet prej skuadrave të rrezikuara për rënie nga La Liga.
Nga 32 ndeshje, Mallorca ka fituar 35 pikë, kurse një pikë më shumë e ka Valencia.
Deri në fund të edicionit aktual kanë mbetur edhe gjashtë xhiro.