Presidenti i SHBA-ve, Donald Trump, ka thënë se Rusia duhet të bëjë një marrëveshje paqeje me Ukrainën dhe se ai do të bëjë çmos për t’i dhënë fund luftës, pas një takimi “shumë të mirë” midis Presidentit Volodymyr Zelensky dhe udhëheqësve të G7 në një samit në Francë.
“Do bëj çfarë të mundem”, u tha Trump gazetarëve të martën në samitin në Evian-les-Bains pranë kufirit zviceran, duke shtuar se shumë të rinj po vdisnin në fushën e betejës nga të dyja palët.
“Shikoni, Rusia duhet të bëjë një marrëveshje”, tha ai. “Unë kam mbyllur tetë luftëra. Kjo ishte ajo që mendova se do të ishte më e lehta për t’u zgjidhur”, tha Trump.
Zelensky iu bashkua bisedimeve të martën në mëngjes me G7-ën, e cila përfshin Shtetet e Bashkuara, Francën, Mbretërinë e Bashkuar, Kanadanë, Gjermaninë, Italinë, Japoninë dhe Bashkimin Evropian. Ai gjithashtu foli me Trump dhe Sekretarin e Shtetit të SHBA-së Marco Rubio në margjinat e samitit.
“Fokusi kryesor është forcimi i mbrojtjes ajrore për Ukrainën dhe avancimi i diplomacisë, për ta bërë Rusinë të përfundojë luftën e saj”, shkroi Zelensky në X pas takimit. “Nevojitet paqja”.
Zelensky tha se kishte marrë angazhime të rëndësishme nga G7. “Më shumë raketa mbrojtëse ajrore së bashku me licenca për t’i prodhuar ato, paketë mbështetjeje dimërore dhe rritje të presionit ndaj Rusisë. E rëndësishme është që SHBA-të janë të gatshme të ofrojnë mbështetje në të gjitha këto linja përpjekjesh”, shkroi ai.
“Është thelbësore që gjithçka që diskutohet të zbatohet. Rusia duhet të mësojë se lufta e saj nuk do të normalizohet kurrë. I falënderoj të gjithë ata që po ndihmojnë”.