Francisco Conceição ka hedhur poshtë pretendimet se kombëtarja e Portugalisë ndihet e detyruar t’ia pasojë topin Cristiano Ronaldos gjatë ndeshjeve të Kampionatit Botëror 2026. Në një konferencë për media në Palm Beach, 23-vjeçari sqaroi se lojtarët nuk kanë asnjë obligim të tillë ndaj veteranit 41-vjeçar.
“Nuk kemi asnjë detyrim apo nevojë t’ia kalojmë topin atij. Unë ia pasoj topin atij që mendoj se është më i lirë në atë moment. Gjithçka bëhet me instinkt, në mijëudhe të sekondës, nuk ka kohë për të menduar për emra,” deklaroi Conceição. Ai shtoi se Ronaldo është aty për të ndihmuar ekipin, ashtu si çdo lojtar tjetër.
Kritikat ndaj ekipit të Roberto Martínezit pasuan barazimin 1-1 në ndeshjen hapëse kundër Republikës Demokratike të Kongos. Portugalia po përgatitet për ndeshjen e radhës në Grupin K kundër Uzbekistanit në Houston, ku synon fitoren e parë në këtë turne.
Conceição, i cili bëri debutimin e tij në Botëror 24 vjet pasi babai i tij, Sérgio Conceição, luajti në turneun e vitit 2002, e vlerësoi Ronaldon si një shembull për gjeneratën e re. “Ai është një shembull për shkak të etjes që tregon çdo ditë, sikur të ishte sesioni i tij i fundit stërvitor. Për ne, është një shembull për shkak të lidershipit dhe golave që shënon,” tha ai.
Anësori i Juventusit, i cili iu bashkua klubit italian nga Porto verën e kaluar në një marrëveshje prej 27.5 milionë paundësh, u shpreh se skuadra është mësuar me presionin. “Të gjithë luajmë në klube të mëdha dhe presioni do të ekzistojë gjithmonë. Kur gjërat nuk shkojnë mirë, ne jemi të parët që e ndiejmë. Na takon neve të japim përgjigjen më të mirë në ndeshjen e radhës, të tregojmë cilësi dhe të fitojmë,” përfundoi ai.