Policia e Kosovës ka publikuar pamje nga armët, municioni dhe pajisjet e tjera ilegale të sekuestruara në tri lokacione të ndryshme në komunën e Zubin Potokut.
Sipas njoftimit të Drejtorisë Rajonale të Policisë në Mitrovicën e Veriut, aksionet janë zhvilluar më 21 qershor pas informacioneve të pranuara nga qytetarët se në disa objekte mund të fshiheshin armë dhe mjete të tjera ilegale.
Gjatë kontrolleve në dy objekte në fshatin Presek dhe një objekt të pabanuar në fshatin Qeçevë, policia ka gjetur dhe konfiskuar tri pushkë të tipit M48, qindra fishekë të kalibrave të ndryshëm, karikatorë, pjesë të uniformave të kamufluara, bateri ndriçuese, si dhe pajisje për mbushjen e fishekëve të armëve të gjuetisë.
Në mesin e materialeve të sekuestruara janë gjetur edhe rreth 200 gramë barut dhe afër 2 kilogramë sfera metalike që përdoren për mbushjen e fishekëve.
Të gjitha veprimet janë kryer në koordinim me Prokurorin e Shtetit, i cili ka urdhëruar inicimin e rasteve për veprën penale “Mbajtje në pronësi, kontroll ose posedim të paautorizuar të armëve”.
Policia ka bërë të ditur se deri në këtë fazë të hetimeve nuk ka persona të arrestuar, ndërsa ka falënderuar qytetarët për bashkëpunimin dhe ndarjen e informacioneve që kontribuojnë në sigurinë publike.