Ministria franceze e Shëndetësisë ka konfirmuar rastin e parë të Ebola-s në Francë. Bëhet fjalë për një mjek i cili ishte kthyer nga një mision humanitar në një zonë të prekur nga shpërthimi i virusit në Republikën Demokratike të Kongos. Pacienti është transferuar në një institucion të specializuar dhe ndodhet në gjendje të qëndrueshme shëndetësore.
Sipas një deklarate të ministrisë, që nga momenti i mbërritjes në vend janë ndërmarrë të gjitha masat paraprake, përfshirë izolimin e pacientit dhe transportin e tij në spital në kushte të sigurta, për të parandaluar çdo rrezik të mundshëm të kontaminimit. Autoritetet shëndetësore janë duke gjurmuar kontaktet e pacientit, të cilët do të duhet të qëndrojnë në izolim shtëpiak për 21 ditë. Ministria ka bërë të ditur se rreziku për publikun e gjerë evropian është shumë i ulët.
Shpërthimi i virusit është përqendruar në provincën Ituri në verilindje të Republikës Demokratike të Kongos, ku autoritetet po përpiqen të frenojnë përhapjen e tij. Sipas të dhënave të fundit të Ministrisë së Shëndetësisë së këtij vendi, deri më 21 qershor janë regjistruar 1,048 raste të konfirmuara dhe 267 vdekje, ndërsa 112 persona janë shëruar. Në shtetin fqinj, Ugandën, janë regjistruar 20 raste dhe dy vdekje.
Organizata Botërore e Shëndetësisë e shpalli shpërthimin e virusit më 15 maj, ndërsa dy ditë më vonë e cilësoi atë si emergjencë shëndetësore me shqetësim ndërkombëtar. Ekspertët vlerësojnë se virusi ka qarkulluar në Republikën Demokratike të Kongos për javë të tëra përpara se të zbulohej.
Aktualisht, lloji i virusit që po qarkullon është varianti i rrallë Bundibugyo, për të cilin nuk ekziston asnjë vaksinë apo trajtim i miratuar. Ky është shpërthimi i 17-të i Ebola-s në Republikën Demokratike të Kongos që nga zbulimi i parë i virusit në këtë vend në vitin 1976. Shkencëtarët besojnë se virusi transmetohet te njerëzit nga lakuriqët e frutave dhe më pas përhapet përmes kontaktit të drejtpërdrejtë me gjakun ose lëngjet trupore të një personi të infektuar.