Manchester United është në bisedime të avancuara me klubin turk Trabzonspor për huazimin e portierit André Onana. Lojtari 30-vjeçar e kaloi sezonin e kaluar në Turqi, por marrëveshja e tij kishte skaduar dhe ai pritej të kthehej në Carrington për fillimin e përgatitjeve parasezonale.
Përfaqësuesit e Onanës u informuan nga drejtuesit e Manchester United gjatë një takimi në muajin maj se ai nuk do të jetë pjesë e ekipit të parë të trajnerit Michael Carrick për sezonin e ardhshëm. Pavarësisht se kontrata e tij me klubin nga Old Trafford është e vlefshme deri në vitin 2028, palët janë pranë finalizimit të një huazimi të dytë radhazi për portierin.
Në të njëjtën kohë, Manchester United po kërkon të afrojë një portier me përvojë gjatë kësaj vere. Klubi po vëzhgon situatën e portierit të dytë, Altay Bayindir, pasi pritet interesim i mëtejshëm për të pas përfundimit të fushatës së Turqisë në Kupën e Botës. Kujtojmë se në janar, United e kishte bllokuar kalimin e tij te Besiktas.
Ndërkohë, portieri i tretë, Tom Heaton, i cili mbushi 40 vjeç në prill, ka nënshkruar një zgjatje të kontratës për një vit tjetër. Megjithatë, drejtuesit e klubit mbeten të interesuar për të sjellë një tjetër portier me përvojë, i cili do të krijonte konkurrencë për vendin e titullarit, Senne Lammens.
Trajneri Michael Carrick dhe lojtarët që nuk janë të angazhuar në Kupën e Botës pritet të nisin stërvitjet parasezonale më 9 korrik. Kjo periudhë do të shërbejë për konsolidimin e grupit përpara fillimit të sezonit të ri, ndërsa klubi vazhdon të punojë për ndryshimet në repartin e portierëve.
Burimi: espn.com