Policia e Kenias ka arrestuar 355 persona në pjesë të ndryshme të vendit, gjatë përpjekjeve për të shpërndarë protestuesit që u mblodhën për të shënuar dyvjetorin e protestave anti-qeveritare të vitit 2024. Në ato protesta, 60 persona humbën jetën si pasojë e ndërhyrjes së forcave të sigurisë.
Ministri i Brendshëm, Kipchumba Murkomen, i cilësoi të arrestuarit si “kriminelë”. Ai kërkoi falje për shqetësimet e shkaktuara nga masat e sigurisë dhe vendosja e pengesave, duke shtuar se këto veprime ishin efektive për të siguruar kryeqytetin dhe pjesë të tjera të vendit.
Në Nairobi, policia përdori gaz lotsjellës për të shpërndarë qytetarët që po mblidheshin paqësisht jashtë stacionit të policisë. Kjo ndodhi pasi forcat e rendit kishin ndaluar gjashtë persona pranë parlamentit, ku ata kishin vendosur lule në nderim të viktimave. Në qendrën e biznesit të qytetit, shumë dyqane dhe restorante mbetën të mbyllura, ndërsa policia vendosi postblloqe me kamionë me ujë.
Udhëheqësit e opozitës dhe familjarët e viktimave iu bashkuan përkujtimit. Edith Wanjiku, nëna e 19-vjeçarit Ibrahim Kamau, i cili u vra në vitin 2024, deklaroi se policia i bllokoi ata ndërsa po përpiqeshin të vendosnin lule. Ajo kërkoi drejtësi dhe kompensim nga presidenti William Ruto për oficerët e përfshirë në vrasjet e protestuesve.
Presidenti Ruto ka pranuar se ka pasur raste të veprimeve të tepruara dhe jashtëligjore nga ana e forcave të sigurisë. Javën e kaluar, ai njoftoi se janë ndarë dy miliardë shilinga keniane, përkatësisht 15.5 milionë dollarë, për viktimat e abuzimeve gjatë protestave. Megjithatë, disa aktivistë kanë vlerësuar se kjo shumë nuk është e mjaftueshme dhe vazhdojnë të kërkojnë një hetim të besueshëm mbi sjelljen e policisë.
Burimi: aljazeera.com