Senegali ka shënuar fitore bindëse 5-0 ndaj Irakut në ndeshjen e fundit të Grupit I, duke përmirësuar ndjeshëm diferencën e golave. Kjo fitore i mundëson Senegalit të renditet në vendin e tretë në grup, duke mbetur në garë për një nga tetë vendet e treta më të mira që dërgojnë në fazën e 32 ekipeve më të mira të turneut.
Iraku, i cili u eliminua nga ky Botëror, luajti me një lojtar më pak që nga minuta e 13-të. Mbrojtësi Rebin Sulaka u ndëshkua me karton të kuq pasi gjyqtari Anthony Taylor, pas rishikimit në monitor, ndryshoi vendimin fillestar nga kartoni i verdhë në të kuq për ndalimin e një mundësie të qartë për gol ndaj Sadio Mané-s.
Habib Diarra zhbllokoi rezultatin që në minutën e katërt. Pas një pjese të parë pa gola të tjerë, Ismaïla Sarr shënoi golin e dytë në minutën e 56-të, pas një aksioni të nisur nga Lamine Camara. Ky ishte goli i tretë i Sarr-it në këtë turne.
Pape Gueye, i cili u inkuadrua në lojë pas golit të Sarr-it, shënoi dy gola të tjerë nga distanca në minutat 59 dhe 71. Rezultatin përfundimtar 5-0 e vulosi Iliman Ndiaye me një goditje nga largësia në minutën e 82-të.
Aktualisht, Senegali mban vendin e pestë në renditjen e ekipeve të treta me diferencë golash +2. Megjithatë, pozicioni i tyre përfundimtar varet nga rezultatet e katër ekipeve të tjera që ende nuk i kanë zhvilluar ndeshjet e fundit të grupeve. Për Irakun, ky ishte Botërori i dytë në histori dhe i pari që nga viti 1986.
Burimi: theguardian.com