Me urdhër të ministrit të Bujqësisë, Armend Muja është kryer inspektimi paparalajmërim i qumështores “Vita” dhe është marrë edhe vendimi për mbylljen e saj.
Këtë vendim e ka dorëzuar një këshilltare politike e tij Majlinda Shabani, e cila nga automjeti zyrtar komunikonte me inspektorët teksa ka refuzuar të prezantohet.
Vendimi ka ardhur pasi prodhuesi ka ulur sasinë e pranimit të qumështit nga 1 korriku, teksa në stook ka thënë se ka më shumë se 2 milionë litra qumësht. Sasia e pranimit është ulur për shkak të mungesës së tregut.
Ndërkaq, drejtori gjeneral i qumështores “Vita”, Artan Spahia ka thënë se vendimi i Mujës është marrë enkas kundër qumështores Vita.
“Ne nuk jemi të Serbisë, ne jemi të Kosovës dhe ti je shkatërruesi i punës 27-vjeçare. Ne si bord morëm vendim që nuk do të pranojmë qumësht, ne sot e mbyllim fabrikën deri në njoftimin e radhës”, ka thënë Spahija.
“Ne nuk jemi kriminelë, ne nuk ikim, ne duam drejtësi. Kompania jonë është e vetme e certifikume në IHF-së, të cilat nuk besoj se i bëjnë ata në Bosnjë e Maqedoni që këta i duan më shumë”, ka thënë Spahija.
“Ministri është ai që po ju mbyll juve, shpresoj që të kthehemi pas shtatë ditësh, por ju them se nga sot qumështorja nuk punon”, ka thënë ai.
Ai ka deklaruar se pushteti “po e do më shumë Serbinë, se neve”, për çka shtoi se kjo nuk do t’i ndalë asnjëherë.
“Ministri i cili më shumë e do Serbinë, më shumë sesa neve. Do më shumë me hy qumështi prej Serbisë, në Maqedoni e me u fut në Kosovë, sesa qumështi i “Vitës”. Ne nuk jemi kriminela, ne kemi me shku faqebardhë, edhe na nuk kemi me u dorëzu, këta munden me kry procedurën e vet, por ne juve nuk ju lëjmë”, tha ai.
Punëtorëve të qumështores “Vita”, Spahija iu premtoi se kompania nuk do t’i lë pas dore, duke iu dhënë fjalën se paga e tyre do të dalë.
“Ne kemi prodhime tjera, ne kemi me vazhdu, nuk munden me na ndalë. Nuk ka mujt as Serbia me na ndal. Ju mos keni merak, rrogat ja’u qesim, dhe ne nuk dorëzohemi”, tha drejtori i ‘Vita-s’ në Istog.
Zyrtari i Agjencionit të Ushqimit, Eroll Shehu ka pranuar se ministri i Bujqësisë, Armend Muja ka dhenë urdhër për inspektim paparalajmërim në qumështoren “Vita”.
Sot 25 inspektorë kanë shkuar për inspektim paparalajmërim në qumështoren “Vita”.
AUVK-ja ia ka mësyrë qumështores për ta mbyllur me arsyetimin se prodhuesi ka ulur sasinë e prodhimit të qumështit nga 1 korriku për shkak të mungesë së tregut.
Ndërkaq, zyrtari duke mos dhenë detaje të tjera, ka pranuar se urdhri është i ministrit.
“Jemi duke e zbatuar vendimin e ministrit, vendimi është që të bëhet inspektimi paparalajmërim, sot e kemi urdhër që të bëhet në këtë qumështore” ka thënë ai.