Në Republikën Demokratike të Kongos ka filluar sot regjistrimi i pacientëve në trialin klinik ndërkombëtar PARTNERS. Ky studim synon të vlerësojë trajtimet potenciale për sëmundjen e virusit Bundibugyo (BVD). Triali do të shqyrtojë nëse dy terapi antivirale – antitrupi monoklonal MBP134 dhe remdesiviri – mund të përmirësojnë mbijetesën te personat e diagnostikuar me këtë virus, si dhe nëse kombinimi i tyre ofron përfitime shtesë.
Triali është sponsorizuar nga Organizata Botërore e Shëndetësisë (OBSH) dhe koordinohet nga Instituti Kombëtar i Kërkimit Biomjekësor (INRB) në Republikën Demokratike të Kongos, Instituti i Mjekësisë Tropikale në Belgjikë dhe Universiteti i Oksfordit në Mbretërinë e Bashkuar.
Që nga fillimi i shpërthimit, mbi 1400 persona janë diagnostikuar me BVD në Republikën Demokratike të Kongos, ndërsa rreth 210 janë shëruar dhe gati 440 kanë ndërruar jetë. Aktualisht, nuk ka trajtime të miratuara për sëmundjen e virusit Bundibugyo, ndërsa trajtimet ekzistuese për sëmundjet e tjera të Ebolas nuk kanë dëshmuar efektivitet për të gjitha llojet e viruseve që shkaktojnë këto sëmundje.
Drejtori i Përgjithshëm i OBSH-së, Dr. Nga ana tjetër, Prof. Amanda Rojek nga Universiteti i Oksfordit theksoi rëndësinë e zhvillimit të kërkimit shkencor paralelisht me reagimin ndaj shpërthimit, për të informuar kujdesin ndaj pacientëve në një kohë sa më të shkurtër.
Triali është i hapur për pacientë të çdo moshe me BVD të konfirmuar. Njësitë pjesëmarrëse do të ofrojnë kujdes mbështetës, duke përfshirë lëngje, mbështetje me oksigjen dhe menaxhim të dhimbjes, në përputhje me udhëzimet e OBSH-së. Ministri i Shëndetësisë i Republikës Demokratike të Kongos, Dr. Samuel Roger Kamba, e vlerësoi këtë nismë si një hap përpara në përpjekjet për të shpëtuar jetë gjatë shpërthimit aktual dhe për të forcuar gatishmërinë globale.
Burimi: who.int