Nevada County në Kaliforni ka nisur një shërbim pilot me autobusë (shuttle) me tarifë prej 2 dollarësh, në përpjekje për të reduktuar kaosin e trafikut dhe rreziqet e sigurisë në lumin South Yuba. Ky lum është një destinacion popullor për not, lundrim, kërcime nga shkëmbinjtë dhe rrezitje, duke tërhequr qindra mijëra vizitorë çdo vit.
Autobusët me kapacitet prej 14 vendesh do të operojnë nga ora 09:00 deri në 18:00 çdo të premte, të shtunë, të diel dhe në ditët e festave zyrtare. Shërbimi do të niset nga Qendra Qeveritare e Nevada City çdo 30 minuta, duke filluar nga fundjava e 4 Korrikut e deri në Ditën e Punës (Labor Day).
Sipas autoriteteve, fluksi sezonal i vizitorëve ka shkaktuar probleme të vazhdueshme, ku makinat mbushin autostradat e ngushta, ndërsa këmbësorët detyrohen të ecin përgjatë rrugëve me trafik të shpejtë.
Shavati Karki-Pearl, menaxhere e programit të ekonomisë rekreative në Nevada County, theksoi se ky shërbim pilot synon të testojë nëse do të arrihet lehtësimi i trafikut dhe parandalimi i parkimit të pasigurt. Autoritetet kanë shtuar gjithashtu masat e kontrollit ndaj konsumimit të alkoolit dhe zjarreve të paligjshme, duke vendosur tabela ndalimi për parkim dhe kuti emergjence në zona me mbulim të dobët të rrjetit celular.
Sgt. Ryan Randar, mbikëqyrës i policisë në California State Parks, theksoi se parkimi i paligjshëm mund të sjellë gjoba nga 162 deri në 321 dollarë, ndërsa automjetet mund të tërhiqen nga shërbimi i karrotrecit.
Edhe pse nivelet e ujit këtë vit janë më të ulëta se zakonisht, duke mbajtur numrin e vizitorëve më të kontrolluar, autoritetet presin rritje të fluksit gjatë periudhës së festave. Shërbimi synon të përmirësojë menaxhimin e ngarkesës përgjatë korridorit 39-milje të lumit.
Burimi: nypost.com