Anëtari i Kryesisë së Aleancës, Daut Haradinaj, ka kritikuar kryeministrin në detyrë për mungesën e Kosovës në Samitin e NATO-s në Ankara, duke thënë se vendi po humb mundësi të rëndësishme për avancimin e interesave të tij strategjike.
Përmes një postimi në Facebook, Haradinaj tha se derisa kryeministri në detyrë ndodhet në Greqi, një shtet që ende nuk e njeh pavarësinë e Kosovës, duke marrë pjesë në simpoziume filozofike, në Ankara po zhvillohet një samit ku Kosova do të duhej të ishte duke ndërtuar partneritete dhe duke hapur rrugën drejt anëtarësimit në NATO.
Sipas Haradinajt, qeveria aktuale po humb mundësi të rëndësishme diplomatike, ndërsa me veprimet e saj po krijon përçarje dhe tensione në raport me aleatët ndërkombëtarë.
Ai theksoi se Aleanca nuk do të lejojë që të dëmtohen marrëdhëniet strategjike të Kosovës me Shtetet e Bashkuara të Amerikës dhe as që, sipas tij, ndikimi rus të gjejë hapësirë në Kosovë.
“Nuk do ta lejojmë që ky vend të kthehet prapa. Nuk do ta lejojmë që të dëmtohet aleanca jonë me Amerikën. Nuk do të lejojmë që ndikimi rus të gjejë hapësirë në Kosovë. Kosova e ka vendin në familjen euroatlantike, krah Amerikës, e cila ka qëndruar pranë nesh në momentet më vendimtare të historisë sonë”, ka shkruar Haradinaj.