Policia e Kosovës ka shkuar në Klinikën Infektive në QKUK, lidhur me rastin e helmimit të rreth 70 personave.
Në Klinikën ku janë shtrirë mbi 20 persona, policët po marrin emrat e pacientëve që janë aty dhe të atyre që janë kontrolluar lidhur me këtë rast.
Klinika Infektive në QKUK ka njoftuar më herët gjatë ditës se nga e premtja në këtë klinikë janë paraqitur pacientë me simptoma të dyshuara të helmimit nga ushqimi.
Sipas njoftimit, “pacientët kanë kërkuar ndihmë mjekësore me ankesa si ethe, temperaturë, dhimbje barku, të vjella dhe diare. Sipas anamnezës së marrë, simptomat janë shfaqur disa orë pas konsumimit të ushqimit”.
“Nga data 10.07.2026 deri më 13.07.2026, në Klinikën Infektive ndihmë mjekësore kanë kërkuar rreth 70 pacientë. Prej tyre, 22 pacientë janë hospitalizuar për trajtim të mëtejshëm. Të gjitha rastet e hospitalizuara janë raportuar në Inspektoratin Shëndetësor, në Institutin Kombëtar të Shëndetësisë Publike të Kosovës (IKShPK), si dhe janë evidentuar në Sistemin e Mbikëqyrjes së Sëmundjeve Ngjitëse (SMSN), në përputhje me procedurat në fuqi”, thuhet në njoftimin e Klinikës Infektive.
Klinika Infektive tha se pacientët e shtruar në spital ishin nën mbikëqyrje të vazhdueshme mjekësore dhe po merrnin trajtimin e nevojshëm.
“Aktualisht, gjendja klinike e pacientëve vazhdon të kërkojë trajtim dhe monitorim të vazhdueshëm”, thuhet në fund të atij njoftimi.