Anglia ka siguruar vendin e tretë në Kampionatin Botëror, pasi mposhti Francën me rezultat 6-4 në ndeshjen e zhvilluar të shtunën në Miami Gardens. Ky rezultat shënon renditjen më të mirë të Anglisë në një Kampionat Botëror që nga viti 1966.
Pjesa e parë u dominua nga Anglia, e cila shkoi në pushim me epërsi prej 4-0. Golat për anglezët u shënuan nga Declan Rice, Ezri Konsa dhe Bukayo Saka, i cili realizoi dy herë.
Në ndeshjen e tij të fundit pas 14 vitesh në krye të Francës, trajneri Didier Deschamps bëri katër zëvendësime në pjesën e dytë, duke inkuadruar lojtarë si Ousmane Dembélé dhe Bradley Barcola. Reagimi francez filloi shpejt, kur Kylian Mbappé shënoi pas asistimit të Michael Olise. Më pas, Barcola shënoi pas një pasimi nga Mbappé, ndërsa ky i fundit realizoi golin e tij të 10-të në këtë turne, duke arritur në kuotën e 22 golave në karrierë në Botëror dhe duke kaluar Lionel Messin në listën e golashënuesve më të mirë në histori të këtij kompeticioni.
Bukayo Saka shënoi nga penalltia në minutën e 87-të, duke u bërë lojtari i katërt anglez që realizon një hat-trick në një Kampionat Botëror.
Në minutat e fundit, Dembélé shënoi për Francën, por Jude Bellingham vulosi fitoren e Anglisë me një gol nga afërsia. Me këtë realizim, Bellingham u bë lojtari i parë anglez që shënon shtatë gola në një edicion të vetëm të Botërorit. Ndeshja prodhoi gjithsej 10 gola, shifra më e lartë në një ndeshje të Botërorit që nga viti 1982.
Burimi: espn.com