Ministri i Jashtëm i Iranit, Abbas Araghchi, thotë se ende nuk është takuar me udhëheqësin e ri suprem të Iranit, Mojtaba Khamanei, që kur ai u emërua në këtë post në muajin mars, shkruan CNN.
Në një intervistë të gjerë, Araghchi tha gjithashtu se mangësitë në siguri, të cilat i mundësuan Izraelit të godiste udhëheqjen iraniane në fillim të luftës, vazhdojnë ende të ekzistojnë.
Ja disa nga pikat kryesore të bisedës së tij me podkasterin Javad Mogouyee.
Para luftës: Duke folur për negociatat me të dërguarit amerikanë Steve Witkoff dhe Jared Kushner në shkurt, Araghchi tha: “I thashë Witkoffit: A ke marrë ndonjëherë pjesë në një takim ku ekzistonte mundësia të bombardohej në çdo moment?”
Sulmet SHBA-Izrael: Araghchi tha se bombardimi i kompleksit të udhëheqjes në Teheran, ku u vra udhëheqësi suprem Ali Khamanei dhe një pjesë e madhe e familjes së tij në shkurt, “u krye përmes një dobësie të sigurisë dhe kjo dobësi e sigurisë ende ekziston”.
“Që nga dita e parë u hartuan plane për mbylljen e Ngushticës së Hormuzit nëse udhëheqësi do të bëhej objektiv”.
Kur mori vesh për vdekjen e Ali Khamaneit: “Menjëherë kontaktova ministritë e Jashtme të vendeve të rajonit dhe u thashë: Ne do të godasim bazat ushtarake amerikane; ta kuptoni se ky veprim është kundër Amerikës”.
Khamanei: “Ende nuk jam takuar personalisht me Aga (udhëheqësin) Mojtaba gjatë kësaj periudhe të udhëheqjes së tij. Vetëm një numër shumë i vogël njerëzish janë takuar me të”.
Gatishmëria ushtarake: “Gjatë tetë muajve ndërmjet dy luftërave [qershor 2025 dhe shkurt 2026], sistemi ynë i lëshimit të raketave u ndryshua në atë mënyrë që, pavarësisht sa shumë raketa lëshonim, ato nuk do të na mbaronin”.
Gjatë konfliktit: “Unë dhe zëvendësministrat e Jashtëm nuk u larguam nga ndërtesa e Ministrisë së Jashtme. Për disa orë në ditë qarkullonim nëpër qytet me automjet; nuk mund ta lija telefonin tim celular mënjanë”.
Hapat e ardhshëm: “Nëse nuk kemi aftësinë të arrijmë një fitore absolute ushtarake, atëherë duhet të negociojmë. Negociatat duhet të zhvillohen kur ke epërsinë në frontin ushtarak”.