Mbrëmë, zyrtari policor, Amir Hoxha njoftoi se është suspenduar nga puna përkohësisht pas një postimi të bërë në rrjete sociale ku kërkonte pagesë për shujtat për policët dhe kritikonte deputetët e Kuvendit të Kosovës për shpenzimet me derivate.
Ndonëse kanë kaluar më shumë se 12 orë që nga njoftimi i tij, Sindikata e Policisë ende s’ka bërë ndonjë reagim.
Reagim s’ka bërë as Ministri i Punëve të Brendshme, Xhelal Sveçla. Në profilet e tij zyrtare në Facebook dhe Twitter, ministri s’ka shkruar asnjë fjalë për Amir Hoxhën.
Ngjashëm sikurse Sveçla, as kryeministri i vendit, Albin Kurti, s’ka reaguar në profilet e tij zyrtare rreth suspendimit të zyrtarit policor, Amir Hoxha.
Krahas krerëve shtetërorë edhe liderët e opozitës Ramush Haradinaj nga AAK-ja, Lumir Abdixhiku nga LDK-ja dhe Memli Krasniqi nga PDK-ja, nuk kanë dhënë qëndrimin e tyre rreth suspendimit të Hoxhës.
Ndryshe nga ta, kreu i PSD-së, Dardan Molliqaj, i ka dalë në mbrojtje, Amir Hoxhës. Ai ka shkruar se qeveria Kurti po e keqpërdorë profesionin e policit.
“Nuk ka profesion më të keqpërdorur nga qeveria Kurti, sesa ai i policit. Mbani mend skenat në veri për hesape elektorale?”, shkruan Molliqaj ndër të tjera në postimin e tij në Facebook.
Molliqaj: S’ka profesion më të keqpërdorur nga Kurti, sesa ai i policit
Daut Haradinaj nga AAK-ja ka thënë se se suspendimi i Hoxhës është i nxituar. Ai ftuar organet kompetente të rishikojnë vendimin e tyre për suspendimin zyrtarit policor.
“Ftoj organet kompetente për rishikim të vendimit dhe rikthimin e Amirit në vendin e punës! Përkundrazi, ai duhet të njihet si Hero pasi që para pak ditësh arriti ta shpëtojë jetën e një qytetari”, shkruan Haradinaj.
Hoxha në postimin e tij në Facebook ka njoftuar se suspendimi ndërlidhet me një postim që e ka bërë gjatë ditës së djeshme për pakënaqësinë e tij rreth mospagesës së shujtave për policët.
Ndërkohë që nga Inspektorati i Policisë së Kosovës kanë thënë se IPK nuk ka bërë ndonjë rekomandim për suspendim dhe se ky suspendim është bërë nga Policia e Kosovës.
IPK thekson se rekomandimi për suspendim nga IPK bëhet në rastet e hetimit të veprave penale dhe kur është në interes të procedurës hetimore.
“Duke ju referuar kërkesave të shumta ju njoftojmë se Inspektorati Policor i Kosovës nuk është duke e trajtuar këtë rast dhe nuk ka bërë ndonjë rekomandim për suspendim dhe se ky suspendim është bërë nga Policia e Kosovës”, shkruhet në njoftimin e tyre.
Amir Hoxha në një postim në Facebook, gjatë ditës së djeshme shkroi se për dallim nga deputetët “paratë e shujtave për policinë si dhe shtesat për punë jashtë orarit nuk jemi duke i marrë edhe pse na takojnë me ligj, me arsyetimin të mungesës së
buxhetit.
“Paratë e shujtave për Policinë , si dhe shtesat për punë jasht orarit nuk jemi duke i marë perkundër se na takojne me Ligj , me arsyetim të mungesës së buxhetit”, deklaronte Hoxha.
Paparaci ka kontaktuar me Policinë e Kosovës, por të njëjtit deri në publikimin e këtij artikulli nuk i kanë kthyer përgjigje mediumit.
Suspendohet zyrtari policor që kritikoi shpenzimet e deputetëve