Në Uashington po mbahet Këshilli i Energjisë BE-SHBA me qëllim të përmirësimit të bashkëpunimit transatlantik në fushën e energjisë, dhe kreu i diplomacisë evropiane, Josep Borrell, ka thënë para takimit se ata janë të përkushtuar për të garantuar sigurinë energjetike për BE-në dhe fqinjët e saj, duke përfshirë Moldavinë, Ukrainën dhe Ballkanin Perëndimor.
Në prag të takimit, Borrell ka publikuar se energjia ka qenë gjithmonë ndër çështjet më të rëndësishme gjeopolitike dhe se tani, me çmimet e larta dhe problemet e furnizimit me gaz të shkaktuar nga kriza me Rusinë, ajo është në krye të agjendës së Brukselit, transmeton Paparaci.
Ai tha se është e nevojshme të përballohen këto presione afatshkurtra duke respektuar strategjinë afatgjatë të kalimit në energjinë e gjelbër dhe se Këshilli i Energjisë BE-SHBA në Uashington do të intensifikojë bashkëpunimin transatlantik në këtë front.
Siç theksoi ai, çmimet e energjisë u rritën për shkak të problemeve globale të kërkesës dhe ofertës. Çmimi i gazit në BE është gjashtë deri në 10 herë më i lartë se vitin e kaluar, gjë që rëndon çmimin e energjisë elektrike, si dhe të gjithë tregun e energjisë elektrike në Evropë.
“Kjo tashmë ka rritur inflacionin në fund të 2021. Nëse çmimet e energjisë janë të larta edhe në vitin 2022 me rritje të inflacionit, kjo do të ndikojë seriozisht në rimëkëmbjen pas pandemisë”, ka thënë Borrell.
Me krizën serioze në marrëdhëniet e BE-së me Rusinë, kjo nuk është bërë vetëm çështje çmimi, por çështje e sigurisë së furnizimit, ka shtuar ai.
“Politika e energjisë vazhdimisht është zvogëluar në marrëdhëniet midis BE-së dhe Rusisë”, ka thënë Borrell, duke shtuar se BE importon më shumë se 40 për qind të gazit të saj nga Rusia dhe se 60 për qind e të ardhurave të importit të Rusisë vijnë nga BE.
Zyrtari evropian thotë se duke reduktuar të gjithë importin e gazit nga Rusia, BE-ja do të investonte jo vetëm në tranzicionin e gjelbër por edhe në uljen e varësisë strategjike. Por në vitet e mëparshme, Rusia ka rritur rezistencën ndaj sanksioneve ekonomike, duke rritur rezervat e saj valutore më shumë sesa ka bërë BE për të rritur kapacitetin e saj për të reduktuar potencialisht furnizimet me gaz, ka thënë Borrell.
Ai shtoi se Brukseli duhet urgjentisht të shqyrtojë zhvillimin e rezervave strategjike të gazit të BE-së dhe mundësinë e furnizimit të përbashkët të gazit.
Rusia edhe më herët ka përdorur furnizimet me energji për qëllime politike. BE së bashku me Shtetet e Bashkuara dhe partnerë të tjerë, mund të kundërshtojnë përdorimin e furnizimeve me energji si armë dhe mjet gjeopolitik, ka thënë ai.
Një deklaratë e fundit e përbashkët BE-SHBA për sigurinë energjetike tashmë e vë theksin në qëndrueshmërinë ndaj goditjeve të ardhshme të çmimeve dhe masave për të mbrojtur kundër tensioneve gjeopolitike në qendër të agjendës së sigurisë transatlantike të energjisë.
“Ne jemi të përkushtuar të garantojnë sigurinë energjetike për BE-në dhe fqinjët tanë, përfshirë Moldavinë, Ukrainën dhe Ballkanin Perëndimor”, ka shkruar Borrell në një postim.
Kreu i diplomacisë evropiane paralajmëroi se BE-ja do të bisedojë me Shtetet e Bashkuara për reduktimin e varësisë së saj nga gazi rus.
“Shtetet e Bashkuara janë tashmë furnizuesi më i madh i gazit natyror të lëngshëm në Evropë dhe ne po intensifikojmë bashkëpunimin për të siguruar që ky furnizim të jetë i sigurt në muajt e ardhshëm”, ka thënë Borrell./Paparaci