Rreth katër muaj pas shfuqizimit të shtatë udhëzimeve administrative, Qeveria e Kosovës është mbledhur të martën për t’i rikthyer ato në fuqi.
Shtatë udhëzimet administrative ishin pjesë e një vendimi të Qeverisë së Kosovës për shfuqizimin e qindra udhëzimeve administrative në një mbledhje të katër muajve më parë.
Në një mbledhje të mbajtur sot, ekzekutivi arsyetoi rikthimin në fuqi të shtatë akteve nënligjore, me qëllim “shmangien e vakumit ligjor” si pasojë e shfuqizimit të tyre në muajin dhjetor të vitit të kaluar.
Siç thuhet në njoftimin e Zyrës së Kryeministrit, shtatë udhëzimet administrative do të mbesin në fuqi deri në nxjerrjen e akteve të reja nën ligjore apo ndryshimit të ligjeve, raporton Paparaci.
Shtatë udhëzimet administrative të shfuqizuara dhe të rikthyera në fuqi me vendimin e sotëm, përfshijnë – mes tjerash – rregullimin për akteve nënligjore për licencimin e profesionistëve shëndetësor, vendosjen e banderolave në produktet medicinale etj..
Shtatë udhëzimet administrative të fuqizuara sot me vendim të ekzekutivit:
1. Udhëzimi Administrativ MMPHI Nr.11/2014 për Themelimin, Zgjedhjen, Përgjegjësitë dhe Funksionimin e Këshillit për Fshatin Hoçë e Madhe;
2. Udhëzimi Administrativ Nr.03/2013 për Këshillin Zbatues dhe Monitorues;
3. Udhëzimi Administrativ për Themelimin, Zgjedhjen, Përgjegjësitë dhe Funksionimin e Këshillit për Trashëgiminë Kulturore të Prizrenit dhe të Zyrës së Qendrës Historike të Prizrenit;
4. Udhëzimi Administrativ 10/2011 për Regjistrimin dhe Licencimin e Profesionistëve Shëndetësorë;
5. Udhëzimi Administrativ 12/2013 për Vendosjen e Banderolave në Produktet Medicinale;
6. Udhëzimi Administrativ 15/2003 për Pagesat e Ekspertëve Profesionalë dhe Komisioneve Profesionale; dhe
7. Udhëzimi Administrativ 13/2013 për Qarkulluesit me Shumicë për Produktet dhe Pajisjet Medicinale.