Presidentja Vjosa Osmani ka deklaruar se sot, me nderime shtetërore është pritur nga presidenti i Republikës së Panamasë, Laurentino Cortizo Cohen për të hapur kapituj të rinj të bashkëpunimit ndërmjet dy vendeve.
Shefja e shtetit u shpreh se përkrahja për Kosovën nuk ka munguar në asnjë kënd të botës, prandaj shtoi se mbështetja e aleatëve si Panamaja është vendimtare për forcimin e pozitës sonë ndërkombëtare.
“E falënderova presidentin Cortizo për mbështetjen e palëkundur, e cila i ka themelet në vlerat tona të përbashkëta demokratike”, shtoi Osmani në Facebook.
Ajo tha se përgjatë takimit, ndër të tjera diskutuan hapat e mëtejmë për ta forcuar bashkëpunimin ndërshtetëror në të gjitha fushat e interesit të përbashkët, përfshirë tregtinë, arsimin, kulturën, ndërmarrësinë si dhe për përkrahjen që i duhet Kosovës në procesin e anëtarësimit në organizata ndërkombëtare.