Drejtoria e Inspekcionit në Komunën e Prishtinës, ka liruar pronën publike në lagjen Emshir në Prishtinë, ku prej gjashtë vitesh kompania “Europrinty” një korsi të rrugës e kishte kthyer në parking privat, shkruan Paparaci.
Korsia e cila ishte kthyer në parking privat nga kompania “Europrinty”, pas ankesave të qytetarëve tash e tutje do të shërbejë si rrugë automobilistike.
Ndryshe, për këtë Paparaci kishte raportuar në mars të këtij viti, ku Drejtoria e Inspekcionit në Komunën e Prishtinës kishte gjobitur me 500 euro kompaninë “Europrinty” Sh.P.K për uzurpim të pronës publike.
“Europrinty” Sh.P.K. është një kompani e cila ka përfituar miliona nga tenderët publikë në Kosovë.
Bazuar në të dhënat e platformës “Prokurimi i Hapur”, 71 kontrata publike i ka përfituar kompania “Europrinty” nga institucionet publike në Kosovë.
Në Agjencinë për Regjistrimin e Bizneseve, “Europrinty” ka deklaruar kapital prej 8 milionë eurove.
Ajo, bazuar në të dhënat publike, është regjistruar si biznes në vitin 2000 dhe merret me prodhimin e materialeve prej letrave, si dhe tregtisë me materiale shkollore. /Paparaci/
Gjobitet kompania që përfiton tenderë nga shteti, uzurpon pronën publike