Në ambientet e Ministrisë së Arsimit është duke u mbajtur takimi i përbashkët ndërmjet Komisionit nga Kosova dhe atij të Shqipërisë për abetaren e përbashkët.
Në këtë takim po diskutohet për unifikimin e një abetare shqip, e që do të përdoret në të dy anët e kufirit.
Këtyre takimeve i ka paraprirë një vizitë e ministres së Arsimit, Arbërie Nagavci më 16 prill të këtij viti në Shqipëri.
Nagavci pas takimit me homologen shqiptare Evis Kushi, kishte shkruar në Facebook se u njoftuan për punën e deritashme të këtyre komisioneve.
“U njoftuam nga afër për punën që është bërë deri në këtë periudhë, përkushtimin dhe angazhimin për një proces transparent, të hapur e të drejtë që mundëson një abetare me standarde bashkëkohore për vogëlushët tanë”, shkroi Nagavci në një postim në Facebook.
Në nëntor të vitit të kaluar në mbledhjen e përbashkët të qeverisë së Kosovës dhe asaj të Shqipërisë ishte nënshkruar marrëveshja për unifikimin e abetares.
“Do na duhet një punë cilësore që të bëjmë një libër të shenjtë laik të gjithë shqiptarëve që të mbetet si objekt i çmuar në të gjitha bibliotekat që si fëmijë e marrin si libër të çmuar për të mësuar dhe e mbajnë si kujtim. Të bëjmë një libër që dhe nga pikëpamja e objektit të jetë e veçantë”, kishte thënë Rama, më 26 nëntor.
Deri më tani nuk janë bërë të ditura detajet se kush do ta botoj “abetaren e unifikuar” apo kush janë konkurrentët nga shtëpitë botuese.