Policia e Kosovës ka lëshuar një komunikatë për media pas përfundimit të protestës së veteranëve dhe arrestimet ndaj kreut të PSD-së, Dardan Molliqaj bashkë me katër funksionarë të tjerë të këtij subjekti politik.
Policia tha se ka bërë përgatitjet e nevojshme operacionale policore, me qëllim të ruajtjes së rendit dhe qetësisë publike si dhe mbarëvajtjes së protestës së lajmëruar sipas ligjit mbi tubimet publike nga Veteranët e UÇK-së.
Tutje u tha se Policia e Kosovës çdo herë ka njohur dhe njeh të drejtën ligjore të qytetarëve për tubime publike, fjalën e lirë në tubime publike, protesta e manifestime publike në pajtim me Kushtetutën dhe ligjet në fuqi.
“Në të gjitha rastet veprimet policore janë realizuar konform Kushtetutës së Kosovës dhe ligjeve në fuqi, për të garantuar rendin dhe sigurinë publike, mbrojtjen e pronës private dhe asaj publike”.
“Asnjë veprim i Policisë së Kosovës nuk është ndërmarr në kundërshtim me procedurat e parapara ligjore, ku specifikohen qartë veprimet policore në rast të nevojës për ndërhyrje apo ndërmarrje të ndonjë veprimi policor në interes të mbrojtjes dhe ofrimit të sigurisë për personat dhe objektet e rëndësisë së veçantë”, thuhet në njoftimin e PK-së.
“Prandaj, konsiderojmë se të gjitha veprimet policore janë realizuar dhe do të realizohen në vazhdimësi në harmoni të plotë me procedurat ligjore që aplikohen dhe në asnjë rast të vetëm nuk do të veprohet në kundërshtim me to. Policia e Kosovës vlerëson se protesta ka përfunduar e qetë dhe pa ndonjë incident, andaj falënderon në veçanti organizatorët dhe pjesëmarrësit për sjelljen dhe bashkëpunimin e treguar me PK-në”.