Kryeministri i Kosovës, Albin Kurti, u takua sot me shefin e misionit të OSBE-së në Kosovë, ambasadorin Michael Davenport.
Në njoftimin e lëshuar të qeverisë thuhet se në takim u diskutua për zhvillimin e fundit në vend dhe për veprimet e fundit të qeverisë në fushën e mbrojtjes dhe respektimit të drejtave të pakicave.
Davenport u shpreh i kënaqur me dakordimin e arritur mbi udhërrëfyesin për zbatimin e marrëveshjes për energji.
“I kënaqur u shpreh edhe me procedimin e programit të Ballkanistikës në Universitetin e Prishtinës. Ai po ashtu falënderoi kryeministrin për video-adresimet e tij të fundit në gjuhën serbe”, thuhet në njoftim.
Kurti tha se respektimi i të drejtave të njeriut, sundimi i ligjit dhe barazia e qytetarëve janë vlera dhe prioritete të qeverisë.
“Ai po ashtu foli për synimin e qeverisë që rritja ekonomike të jetë e qëndrueshme dhe e barabartë, nga e cila të gjithë përfitojnë sepse të gjithë kanë kontribuar. Kurti deklaroi se Kosova ka dëshmuar që zhvillimi ekonomik dhe qeverisja demokratike shkojnë krahas njëra-tjetrës dhe janë thelbësore për paqe të qëndrueshme, progres dhe mirëqenie sociale për të gjithë”, thuhet në njoftim.