Qeveria e Kosovës të mërkurën, mes tjerash, miratoi vendimin për emërimin e Bordit të ndërmarrjes publike, Kompania Rajonale e Ujësjellësit “Gjakova”.
Kryeministri Albin Kurti, ka prezantuar kandidatët e nominuar për KRU “Gjakova”.
“Asociacioni i komunave ka dërguar listën me kandidatë të nominuar për KRU Gjakova. Për drejtor të bordit, propozoj të emërohen këta kandidatë: Urim Gashi – kryesues; Arianeta Nura – antare; Vildane Maloku – anëtare dhe Jeton Haxhijaha – anëtar”, tha shefi i qeverisë.
Në mesin e të emëruarve është edhe një anëtar i Lëvizjes Vetëvendosje në Rahovec. Bëhet fjalë për Jeton Haxhijahën i cili ka raporte të afërta me deputetin e partisë në krye të shtetit, Visar Korenica.
I njëjti shihet shpeshherë me ligjvënësin e pushtetit që ka filluar me “kapjen” e ndërmarrjeve publike.
Lëvizja Vetëvendosje, e cila vazhdimisht është ankuar për punësimet nepotiste të së kaluarës nga partitë politike, tashmë kohë pas kohe po e dëshmon të kundërtën.
Përveç punësimeve familjare dhe të militantëve, tashmë pushteti po ndërhyn edhe në ndërmarrjet publike. Rrjedhimisht, nga çkapja e ndërmarrjeve shtetërore – premtim i Albin Kurtit – është shndërruar në kapjen e tyre.
Megjithatë, në mbledhjen e së mërkurës të ekzekutivit, Kurti bëri të ditur se mandati i të punësuarve në Bordin e KRU “Gjakova” do të zgjasë 3 vite.
Vendimi i sotëm u miratua me unanimitet në mbledhjen e sotme të qeverisë. /Paparaci.com