Kryeministri i Kosovës, Albin Kurti, në një takim me shqiptaro-amerikanen Besa Tafilaj Pinchotti, drejtore ekzekutive e Shoqatës Kombëtare të Familjeve Ushtarake, kujtoi sakrificën e ushtarakëve amerikanë dhe familjeve të tyre.
Në takimin me zonjën Tafilaj Pinchotti në veçanti u përmendën dy pilotët e helikopterit Apache, oficerët David A. Gibbs dhe Kevin L. Reichert që humbën jetën në Shqipëri më 1999, gjatë operacioneve mbështetëse për ndërhyrjen e NATO-s në Kosovë.
Sipas njoftimit nga Zyra e Kryeminsitrit, në takim gjithashtu u fol për përkushtimin e Qeverisë për sigurinë, si dhe për bashkëpunimin e shkëlqyeshëm me SHBA.
Po ashtu u theksua rritja e buxhetit të sektorit të mbrojtjes, më i larti që ka pasur ndonjëherë Kosova, si dhe angazhimi për të zhvilluar një forcë ushtarake profesionale dhe të shkathët në përputhje me doktrinën dhe standardet e NATO-s.
Tafilaj Pinchotti, foli për misionin dhe aktivitetet e Shoqatës Kombëtare të Familjeve Ushtarake, e themeluar më 1969, që përfaqëson miliona pjesëtarë të familjeve ushtarake në SHBA përmes avokimit dhe programeve mbështetëse.
Tafilaj Pinchotti, babai i së cilës vjen nga Deçani, rikujtoi kohën kur ajo ka raportuar për luftën dhe periudhën e pasluftës së Kosovës si gazetare në rrjetet televizive ABC dhe NBC, thuhet në komunikatën për media.